Нæ республикæйы мидхъуыддæгты æмæ æнæнхъæлæджы уавæрты министрадты кусджытæ аразыннц рейдтæ

Ног азы бæрæгбонмæ баззад нымад бонтæ. Адæм сæхи бæстонæй цæттæ кæнынц. Нæ республикæйы мидхъуыддæгты æмæ æнæнхъæлæджы уавæрты министрадты кусджытæ аразыннц сæрмагонд рейдтæ. Бæрæг кæнынц пиротехникæйы хæрзхъæддзинад. Уымæй уæлдай ма уæйгæнджытæй бацагурынц сæрмагонд уæй кæнынмæ бар дæттæг гæххæтытæ. Бæрæгбоны агъоммæ сæ нырма хъæуы бабæрæг кæнын бирæ дуканитæ. Ног азы бæрæгбоны агъоммæ Цæгат Ирыстоны мидхъуыддæгты æмæ æнæнхъæлæджы цауты министрадты кусджытæ иумæйагæй иртасынц æнæзакъонæй пиротехникæ чи уæй кæны, уыдоны. Специалисттæ бабæрæг кодтой республикæйы пиротехникæ кæм парахат кæнынц, уыцы дуканитæ æмæ базартæ. Сæйрагдæр у, цæмæй пиротехникæ кæм уæй кæнынц, уыцы бынæттæ æмбæлгæ домæнтæн дзуапп дæттой. Специалисттæ сбæрæг кодтой, пиротехникæ цы уавæрты дарынц, документтæ æмæ сæм сæрмагонд лицензитæ ис, æви нæ, уый. Ацы хъуыддагмæ куыдфæндыйы цæстæй нæй кæсæн, зæгъынц æнæнхъæлæджы цауты министрады кусджытæ. Нæ республикæйы фылдæр дуканитæ пиротехникæ уæй кæнынц æмбæлгæ домæнтæм гæсгæ. Куыд дзы пайда кæнын хъæуы, уый тыххæй та адæмы æдасдзинадæн бацæттæ кодтой æмбарынгæнæн сыфтæ. Фыдыбыз цæмæй ма æрцæуа, уый тыххæй хъуамæ алчидæр лæмбынæг кæса пиротехникæйы пайдакæныны фæткмæ. Профилон ведомствæты уæнгтæ адæмы зæрдыл лæууынц кæнынц, цæмæй пиротехникæ æлхæной сæрмагонд дуканиты. Ныртæккæ уынгты æнæ бардæттæг гæххæтытæй пиротехникæ чи уæй кæны, уыдонæн сæ мидхъуыддæгты министрады кусджытæ райсынц. Закъоны домæнтæ чи нæ феххæст кæны, уыдоныл скæнынц административон хъуыддæгтæ. Къутæрты Аидæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv