Никотинхæццæ «снюс» æмæ «насвай»-ы ныхмæ бахастой хъæппæрис

Никотинхæццæ «снюс» æмæ «насвай» цæмæй мауал уæй кæной, уый тыххæй хъæппæрис бахастой Дзæуджыхъæуы администрацийы. Сæрмагонд курдиат арвитдзысты Цæгат Ирыстоны хицауадмæ. Хъуамæ сæ бахæссой, наркотиктæ цы буаргъæдты ис, уыдоны хыгъдмæ. Уæд нымад уыдзысты æнæзакъоныл æмæ сæм фылдæр цæстдарджытæ уыдзæн. Хъæппæрисы æууæлтыл бæстонæй æрдзырдтой Дзæуджыхъæуы администрацийы сæрмагонд æмбырды. Горæты минæвæртты æмбырды сæрдары хæдивæг Бестауты Сослан куыд радзырдта, афтæмæй 2015-æм азы Паддзахадон Думæ сфидар кодта закъоны проект, цæмæй «снюс» мауал уæй кæной, фæлæ кæцыдæр дуканиты ныр дæр ма уыцы зианхæссæг буаргъæд уæддæр парахат кæнынц. Уый та уый аххосæй, æмæ се'скæнджытæ тамако сыгъдæг никотинæй баивынц. Афтæмæй, закъон нæ халгæйæ, йæ сæрты хизынц. Æмбырды архайдтой медицинон къабазы кусджытæ дæр. Цæгат Ирыстоны наркодиспансеры сæйраг дохтыр куыд фæбæрæг кодта, афтæмæй ацы æвзæр буаргъæдыл адæм тагъд фæцахуыр вæййынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv