Цæгат Ирыстоны фыццаг хатт сараздзысты зæххыты кадастрон интерактивон картæ

Цæгат Ирыстоны фыццаг хатт сараздзысты зæххыты кадастрон интерактивон картæ. Уым нысангонд уыдзысты зæххы хицау, йæ фæзуат, хаццоны йæ цавæр æмгъуыдмæ райстой, уый æмæ зæххы гæппæлы миниуджытæ. Уый тыххæй информацион агентад «ТАСС»-æн фехъусын кодта республикæйы паддзахадон исбон æмæ зæххы ахастыты министр Тедеты Руслан. Куыд ма бафиппайдта, афтæмæй бирæты нæ фæнды ацы информаци рахъæр кæнын. Фæлæ дзы æмбæхсинаг ницы ис, хъуыды кæнынц министрады. Картæйы уыдзысты, республикæ, муниципалитеттæ æмæ федералон паддзахады бæрны чи ис, уыцы зæххытæ. Уыимæ дзы бæрæг уыдзæн зæххыты нысан дæр: хосгæрстытæ, хуымзæххытæ, фосхизæнтæ æмæ бирæазыккон зайæгойтимæ фæзуæттæ. Зæххыты инвентаризацийы кой куы кæнæм, уæд уый та сарæзтой 2016-æм азы республикæйы сæргълæууæг Битарты Вячеславы хъæппæрисмæ гæсгæ. 2012-æм æмæ 13-æм азты цы инвентаризаци цыд, уый рæстæг республикæйы зæххыты кæцыдæр хай регистрацигонд не `рцыд. Бынæттон администрацитæн уыцы бар нæ радтой, уымæн æмæ иуæй-иу зæххытæ республикæйы цæрджытæн радтой цæрæнбонтæм. Зæххыты ревизи сарæзтой, сæ нысаниуæгмæ гæсгæ дзы кæцытæй нæ пайда кæнынц, уый сбæрæг кæнынмæ. Уыимæ ма кастысты, зæххытæ арендатортæн закъонмæ гæсгæ лæвæрд æрцыдысты æви нæ, уымæ. Бафтаудзыстæм ма уый, æмæ инвентаризацийы рæстæг Цæгат Ирыстоны рабæрæг кодтой 20 мин гектары уæгъд зæххытæ. Бирæтæ дзы хъæддаг бæлæстæ æмæ къудзиты бын фесты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv