Зымæгæн - хæрзбон!

Æрыдоны зымæгæн хæрзбон зæгъынæн сарæзтой æцæг бæрæгбон. Цыдис Æрыдоны, Цæгат Кавказы аграрон-технологон колледжы. Æрæмбырд дзы сты колледжы Æрæфы æмæ Алагиры районты хайæдты ахуырдзаутæ æмæ ахуыргæнджытæ дæр. Сæ тыхтæ бафæлвæрдтой шашкæтæ, шахматтæ æмæ волейболæй, скодтой лауызтæ. Хъесаты Мæдинæ колледжы ахуыр кæны æртыккаг аз. Уыцы рæстæгмæ чъиритæ кæныны сусæгдзинæдтæй алцыдæр базыдта. Куыд зæгъы, афтæмæй хорз хыссæ скæнынæн канд арæхстдзинад фаг нæу. Хъуамæ ма адæймаджы зæрдæйы ахаст дæр цинæйдзаг уа. Уæд ын æвзæрæй тас нæу. Мæдинæйæ уæлдай ма сæ арæхстдзинад равдыстой колледжы иннæ ахуырдзаутæ дæр. Алыхуызон чъиритæ æмæ адджын гуылтæ скæнын у сæ фæлварæны домæн. Дæттынц æй æрвылаз. Сæ сæрæндзинадæн та сын аргъ скæны эспертон къамис. Лæмбынæг æркæсынц чъириты `ддаг бакастмæ, хæрзад сты æви нæ, фæсивæд кусæнгæрзтимæ куыд архайынц, стæй хыссæ куыд кæнынц, уымæ. Фæлварæны сæйраг эксперт Марина Баранчикова: «Фарон дæр ам уыдтæн фæлварæнты рæстæг. Æмæ фаронимæ абаргæйæ ацы аз студентты арæхстдзинад зынгæ фæхуыздæр. Сæ чъириты хæрзхъæддзинад дæр зынгæ аивта. Æмтгæй райсгæйæ, ацы колледжы ахуырдзаутæ фæлварæн куыд дæттынц, уымæй тынг разы дæн». Колледжы ма сарæзтой цымыдисаг концерт. Æрбахуыдтой йæм сæ филиалты минæвæртты Æрæфы æмæ Алагиры районтæй. Уазджыты йæ рæсугъд зарджытæй бахъæлдзæг кодта Æрыдоны хъазахъхъаг хор. Алкæй бон ма уыд дæсныйад æвдисæг ахуырты бацархайын, пуртитæй рухсгæнæнтæ саразын, шашкæтæ, шахмæттæ, волейбол æмæ съолыл теннисæй ахъазын. Колледжы уазджытæ бæрæгбоны мадзалæй баззадысты разыйæ. Сæ хъуыдымæ гæсгæ, ахæм мадзæлтты руаджы фæсивæд æмæ хистæртæ кæрæдзийы хуыздæр базонынц, сæ рæстæг хъæлдзæгæй æмæ пайдаджынæй арвитынц. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv