Тых - иудзинады

Спорты галуан «Манеж»-ы цæуы Æппæтуæрæсеон адæмон хъæзтытæ æмæ национ спорты хуызты фестиваль. Спортсменты Дзæуджыхъæуы 7-æм хатт суазæг кодтой. Фестивалы архайынц Цæгат Кавказы скъолаты ахуырдзаутæ æмæ училищæты студенттæ. Дыууæ боны фæсивæд сæ тыхтæ æвзарынц хъæбысхæстæй, дзюдойæ, армрестлингæй æмæ уæзæгтæ исынæй. Уымæй уæлдай ма регионты командæтæ сæ арæхстдзинад равдыстой кафын æмæ зарынæй, бацæттæ кодтой сæ адæмы æрмдæсныйады хуызты равдыст. Альберт Тажев у Кæсæг-Балхъарæй. Дзюдойы секцимæ цæуы 8 азы. Ныридæгæн дæсгай ерысты архайдта. Фæлæ уæлдай æхсызгонæй йæхи цæттæ кодта национ спорты хуызты 8-æм фестивальмæ. Уыд Цæгат Ирыстоны. Йæ ныхæстæм гæсгæ, ахæм ерысты архайын – рамбулынæй вазыгджындæр у. Кæсæг-балхъары командæйы уæнг Альберт Тажев: «Ацы фестиваль иннæтæй хицæн уымæй кæны æмæ дзы Цæгат Кавказы республикæтæ иууылдæр кæй архайынц. Тынг æхсызгон мын у мæхи се хсæн равдисын, семæ ерыс кæнын, нæ тыхтæ бафæлварын. Ныхæй-ныхмæ æрлæууæм æрмæст дæр спортивон гауызыл, фæлæ царды хорз хæлæрттæ стæм». Ахæм архайджытæ ерысты бирæ ис. Сты Цæгат Кавказ решионтæй. Лæппутæ æмæ чызджытæ та сæ тыхтæ æвзарынц армрестлинг, уæзæгтæ исынæй, дзюдо æмæ хъæбысхæстæй. Цæгат Ирыстоны командæйы уæнг Елхъанаты Данæ: «Хæцыдтæн Кæсæг-Балхъары спортсменкæимæ. Зын нæ уыд. Хъуыд æрмæстдæр хи хорз бацæттæ кæнын. Национ спорты хуызты фестиваль мын хуымæтæг ерыстæ не сты. Се руаджы базонгæ дæн спорсментимæ иннæ республикæтæй». Фестивальмæ нæ республикæмæ канд спортсментæ не ссыдысты, фæлæ сфæлдыстадон, кафджыты æмæ музыкалон коллективтæ. Алчидæр æвдисы йæ адæмыхатты культурæ æмæ традицитæ. Цалынмæ уал ерысгæнджытæ сæ тыхтæ спортивон гауызтæ æмæ татамийыл æвзарынц, уæдмæ гыццыл фалдæр та цымыдисаг ерыстæ бацайдагъ – национ хъæзтытæ. Афтæ иу ирхæфстой сæхи нæ рагфыдæлтæ. Спортивон аренæйы уæлдай ма адæймаг цæмæ бакæса, уый ис. Стыр фæзуатыл равæрдтой Цæгат Кавказы адæмы рагон цард æвдисæг равдыст. Æрмдæсныты хиконд дзаумæтты армукъа дæр чысыл фалдæр. Суанг ма æвдисгæ дæр кæнынц, куыд быйынц, куыд пирынц æмæ хъуын куыд бакусынц, уый. Цæгат Ирыстоны делегацийы уæнг Танделаты Розæ: «Уæхæдæг æй уынут, рагон цардæй скъуыддзæгтæ æвдисæм. Чызджытæ æмæ лæппутæ æвдисынц традицион æрмдæсныйæдтæ. Нæ фыдæлтæ къуымбилы куыст куыд кодтой, уый уынут, уæдæ мæсгуытæ дæр куыд амадтой, уый дæр. Бирæ цыдæртæ нæм фенæн ис». Ерыстæ цæуынц дарддæр. Изæры та – хатдзæгтæ скæныны рæстæг. Спортсментæ сæ хæдзæрттыл сæмбæлдзысты æрмæст сæ хæрзиуджытимæ нæ, фæлæ ма хъæлдзæг зæрдахаст æмæ рæсугъд æнкъарæнтимæ. Уый нæ фæлæ ма сæ алчидæр æнхъæлмæ кæсдзæн уазæгуарзон зæххыл ног фембæлдтæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv