Сывæллæтты хъомады райрæзты центр «Альтаир» æнтыстджынæй кусы Беслæны

Курдиатджын сывæллæтты фарсмæ балæууын, сæ гæнæнтæ сын фæуæрæхдæр кæнын. Ахæм хæс сæ размæ сæвæрдтой центр «Альтаир»-ы кусджытæ Беслæны. Центр байгом кодтой фарон. Дзуапп дæтты нырыккон домæнтæн, уыимæ у бирæвæрсынг. 5 азæй фылдæр цы сабитыл цæуы, уыдонæн дзы фадат ис хи раргом кæнынæн. Зæхкуыстзонадæй райдай æмæ IT-технологиты онг. Æппæт кълæстæ ифтонггонд сты хъæугæ кусæнгæрзтæй. Ацы центры ис æппæт уавæртæ, хи алы къабæзты бафæлварын кæй фæнды, уыдонæн. Робот сæмбырд кæнын, кæнæ фыццаг медицинон æххуыс бакæнын. Сывæллæтты хъомады райрæзты центр «Альтаир»-ы сабитæ сæхи фæлварынц фæлтæрдджын ахуыргæнджытимæ. Кæд фарон байгом уæддæр æм зæрдæргъæвдæй цæуынц ахуыртӕ Беслæны скъоладзаутæ æмæ студенттæн. Центр ифтонггонд у æппæты нырыккондæр кусæнгæрзтæй. Кусæн уæттæ дзуапп дæттынц хицæн къабæзтæн. Мæнæ сæ ам ахуыр кæнынц сæрмагонд техникæйæ раст пайда кæныныл. Мæнæ ам та сывæллæтты ахуыр кæндзысты хъæрмуаты куыстыл, зайæгойтимæ раст архайдыл. Алчи дæр дзы ссардзæн зæрдæмæдзæугæ хъуыддаг. Æнтыстджын райрæзты фæдыл центр бадзырдтæ баффысы республикæйы уæлдæр ахуыргæнæндæттæ æмæ скъолатимæ. Ахæм хуызы фæсивæд равзарынц цы факультетмæ бацæудзысты ахуыр кæнынмæ, уый. Цы уроктæ сын амонынц, уыдоны руаджы та сæ фидæны дæсныйады хи фенынц. Зæгъæм, Беслæны 3-æм скъолайы ахуырдзаутæ сæхи бафæлвæрдтой зæхкуыстзонады. Бацамыдтой сын бæласы талатæ куыд садзын хъæуы, уый. Центр «Альтаир» фæсивæды æрмæст ахуыргæнæндонмæ бацæуынмæ нæ цæттæ кæны. Уæлæмхасæн ахуырады руаджы сывæллæттæ сæхицæн ссарынц ног хæлæрттæ, фæуæрæхдæр кæнынц сæ гæнæнтæ. Сæйрагдæр та сæ фидæнмæ хъæддых цыд акæнынц.