Хæххон паддзахадон аграрон университеты райдайдзысты кусæг дæсныйæдтæм гæсгæ специалистты цæттæ кæны

Хъæууон хæдзарады райрæзт, æнæмæнг, æхсызгон у. Кæд къабазы бæрæггæнæнтæ рæзынц, уæд фæлтæрджын кадртæ та нæ фаг кæны. Куыстады хъæуы ветеринартæ, агрономтæ, зоотехниктæ æмæ æндæр специалисттæ. Ацы фарста аиуварс кæныныл архайынц. Кусджытæн аразынц æппæт уавæртæ куыд куысты фæткы, афтæ мызды бæрцæй дæр. Къабазæн æххуысæн ма æмбæлгæ специалистты цæттæ кæндзысты Хæххон паддзахадон аграрон университеты. Нырыккон ифтонггарзы автоматикон æгъдауæй цъар фыдджинагæй айдзаг вæййы. Уый фæстæ йæ бадарынц æмбæлгæ температурæйы. Дарддæр къалбасы продукци фенæн вæййы республикæйы дуканиты тæрхæджытыл. Фæлæ хъуыддаг æрмæст фыццаг æркастæй зыны æнцон. Дзидза стæгæй фæхицæн кæнын, хæйттыл æй адих кæнын, барстхайттæм сой бафтауын, уый фæстæ йæ æрыссын. Алы продукт дæр сцæттæ вæййы цалдæр къæпхæны фæстæ, уыимæ ма æмбæлгæ технологитæ нымайгæйæ. Æнæмæнг, æххæст кæнын хъæуы æмбæлгæ домæнтæ дæр. Науæд продуктæн канд йе 'ддаг бакаст нæ фехæлдзæн, фæлæ ма йæ ад дæр. «Мясной дар»-ы кусы 12 адæймаджы. Куыстуаты кондад схизы 5 мин тоннæйы онг. Сæйраг технологы ныхæстæм гæсгæ, алы цехы дæр нæ фаг кæны специалисттæ. Ахæм уавæр сæм сæвзæрд афæдзы 'рдæджы размæ. Куыст æмбæлгæ фæткыл æмæ афоныл мызд, фæлæ уæддæр фаг специалисттæ нæй. Ахæм уавæр ис хъæууон хæдзарады алы къабазы дæр. Уый бафиппайдта дзуапдæттæг министр дæр. Къусраты Алан куыд фæнысан кодта, афтæмæй республикæ цух 'ййафы агрономтæ, ветеринартæ æмæ зоотехниктæй. Кусæг дæсныйæдты специалистты цæттæ кæнын фæнд кæнынц Хæххон паддзахадон аграрон университеты. Ахуыргæнджыты арвитдзысты фæлтæрддзинад уæлдæр кæнæн ахуыртæм. Ныртæккæ лицензи саразынæн æмбырд кæнынц хъæугæ гæххæттытæ. Ахуырадон уагдоны разамынды ныхæстæм гæсгæ, ам дарддæр дæр архайдзысты, цæмæй агропромышленнон къабазмæ цæттæ кæной аккаг æмæ æрыгон специалистты.