Узбекистанмæ кусынмæ

Кæд æмæ завод «Электроцинк» сæхгæдтой, уæддæр Цæгат Ирыстоны дарддæр дæр цæттæ кæнынц металлургийы къабазы специалистты. Абон Цæгат Кавказы хæххон-металлургон институты бафыстой бадзырд Узбекистаны уæлдæр ахуыргæнæндонимæ. Йе руаджы студенттæн фæзындзæн ног гæнæнтæ. 1931-æм азы адæмон хæдзарады уæлдæр совет сарæзта хæххон -металлургон институт. Уæд дзы уыд æрмæст дыууæ факультеты - металлургон æмæ хæххон æрзæты. Ног уæлдæр ахуыргæнæндоны размæ сæвæрдтой сæрмагонд хæс: - Садоны зды æмæ цинкы комбинатмæ специалистты цæттæ кæнын. Уыцы ххæс æнтыстджынæй æххæст кодтой. Институты рауагъдонты цин кæнгæйæ истой æндæр куыстуæттæм дæр. «Мах алкæддæр цæттæ кодтам специалистты æгас бæстæйæн дæр. Советон Цæдис раздæр, ныр та Уæрæсейы металлургон куыстуæтты кусынц нæ рауагъдонтæ. Кæд, зæгъæм, Мæскуыйæгтæ нæ уарзынц искуыдæм дард ацæуын æмæ уым кусын, уæд мах фæсивæд та цæттæ сты уымæ. Бирæ æнтыстдзинæдтæ сæ къухы бафты. Бирæтæ дзы разамонджытæ дæр свæййынц, фæлæ, хъыгагæн, нæ республикæйы – нæ», - Цæгат Кавказы хæххон-металлургон институты металлургийы кафедрæйы разамонæг Алхъацаты Владимир. Андраник Микаэлян у Цæгат Кавказы хæххон-металлургон институты 3-æм курсы студент. Ахуыр кæны геологыл. 7-æм къласæй фæстæмæ йæ фæндыд ацы къабазы кусын. Фæлæ ныридæгæн дæр мæт кæны куыст ссарыны фарстайыл. «Фæнды мæ, бæргæ, куыст нæхи республикæйы ссарын. Фæлæ нæ рауадзæн. Ацы дæсныйад кæмæ ис, уыцы специалисттæн нæм куыст нæй. Цæгат Ирыстоны мæ баззайын фæнды. Фæлæ куыст куы нæ ссарон, уæд ма ацæуын бахъæудзæн», - Цæгат Кавказы хæххон-металлургон институты 3-æм курсы студенте Андраник Микаэлян. Хуызджын металлургийы къабазы Цæгат Ирыстоны куыстой 3 куыстуаты - Садоны комбинат, заводтæ «Победит» æмæ «Электроцинк». Уыдонæй ма кусы иу – «Победит». Ацы заводы студенттæ сæ зонындзинæдтæ сфæлхат кæнынц практикæйы. Фæлæ ацы куыстуаты дæр бирæ кусджытæ нæ хъæуы. Уæдæ, «кæдæм цæугæ у кусынмæ студентæн», зæгъгæ бафарстам хæххон-металлургон институты ректоры. Йæ ныхæстæм гæсгæ, ныртæккæ Цæгат Ирыстоны ахæм куыстуаттæ фаг нæй. Фæлæ студенттæн сæ бон у иннæ регионты куыст ссарын. Уæрæсейы бирæ куыстуæттæ исынц Цæгат Кавказы хæххон-металлургон институты рауагъдонты. Ахуыргæнæндоны разамынд ма бафыста сæрмагонд бадзырд фæсарæйнаг куыстуатимæ дæр. «Уый у хæххон-металлургон комбинаттæй æппæты стырдæртæй иу. Схонæн æй ис кластер. Уымæн æмæ уыцы куыстуаты алыварс Узбекистаны саразынмæ хъавынц горæт. Нæ студенттæн кусыны фадат уыдзæн Тебинбулакаг хæххон-металлургон комбинаты», - Цæгат Кавказы хæхон-металлургон институты ректор Юрий Дмитрак. Ацы хъуыддаг сырæзт, Уæрæсе æмæ Узбекистан æмгуыстады бадзырд кæй бафыстой, уый руаджы. Равзæрстой дыууæ къабазы - ахуырад æмæ специалистты бацæттæ кæнын промышленнон куыстуæтты кусынмæ. Проект у тынг ахадгæ. 104 студенты Узбекистанæй ахуыр кæндзысты Цæгат Кавказы хæххон-металлургон институты. Уый фæстæ комбинаты кусынмæ ацæудзысты. Юрий Дмитракы ныхæстæм гæсгæ, специалисттæ бахъуыд фылдæр, сæ бон бацæттæ кæнын цас бацис, уымæй. «Хъæуы дзы 5000 адæймаджы. Уый у дунейы æппæты стырдæр хæххон-металлургон кластер. Хъæуы сæ 20 дæсныйады специалисттæ. Мах ныртæккæ цæттæ кæнæм хæххон хъуыддаг æмæ металлургийы æппæт дæсныйæдты специалистты дæр», - Цæгат Кавказы хæхон-металлургон институты ректор Юрий Дмитрак. Узбекаг студенттæ ахуыр кæнын райдайдзысты ног ахуыры азæй. Рауагъдонтæм та куыстуæтты æнхъæлмæ кæсынц ныртæккæ дæр. Биджелты Бертæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv