Уырыссаг театры байгом равдыст «Легендарный театр Кавказа»

Евгений Вахтанговы номыл уырыссаг академион театры байгом историон-документалон равдыст «Легендарный театр Кавказа». Экспозицийы равдыстой театры хъæздыг æмæ бирæвæрсыг истори. Уазджыты бон фенын уыд рагон къамтæ, революцийы агъоммæ цы спектакльтæ рацыд, уыдоны программæтæ, сценикон уæлæдарæс. Театры сæ куыст райдыдтой зындгонд актер Евгений Вахтангов æмæ номдзыд фыссæг Михаил Булгаков. Уыдон театры культурон рæзтмæ бахастой стыр æвæрæн. Равдыстæн йæ сæйраг хæс у театры истори дарддæр рæсугъдæй хæссын æмæ адæмы дæр йемæ базонгæ кæнын. Равдыст саразыны фæнд разынд æнæкоммерцион автономон организаци «Арфа»-мæ. Йæ советы разамонæг Хæбæлаты Фатимæ куыд фæбæрæг кодта, афтæмæй бахатыдысты фыдыбæстæйы историйы фондмæ. Бакуыстой бирæ архивон æрмæджытимæ. Спайда кодтой Цæгат Ирыстоны гуманитарон æмæ социалон иртæстыты институты архивтимæ дæр. Равдысты аразджытæ куыд загътой, афтæмæй театры историйæн равдыстой йæ сæдæм хай. Афтæ цымыдисаг æмæ хъæздыг у. Экпозици фенæн уыдзæн 11 декабрьмæ, Уырыссаг театры. Владимир Уваров, Евгений Вахтанговы номыл уырыссаг театры аивадон разамонæг: «Ныфс мæ ис, нæ республикæйы историйы стыр бынат кæй ахсы уырыссаг академион театр. Ацы аз нæ театрыл æххæст кæны 149 азы. Уыцы хъуыддаг, нæ республикæйы культурæйыл æнувыд чи у, уыдон сфæнд кодтой сбæрæг кæнын. Сарæзтой ацы цымыдисаг равдыст. Тынг æхсызгон мын у, абон бирæ фæсивæд кæй æрбамбырд сты, уый. Мæнмæ гæсгæ, равдыстæн ис стыр ахадындзинад. Ис нæм ахæм хъуыды, нæ театры 150-азон юбилеймæ чиныг рауадзын дæр». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv