Цæгат Ирыстон архайдта æппæтуæрæсеон акци «Аивæдты `хсæв» ы

Цæгат Ирыстон архайдта æппæтуæрæсеон акци «Аивæдты `хсæв»-ы, зæгъгæ. Цыдис ивгъуыд бонты. Йæ фæлгæты йын сарæзтой аивадон фембæлдтытæ æмæ кинонывты равдыст. Ацы хатт аивадон æхсæв баиу Адæмы иудзинады бæрæгбонимæ æмæ уымæй уæлдай ахадгæдæр уыдис. Тугъанты Махарбеджы номыл æмæ Национ музейтæ, стæй Наукон чиныгдон сæ дуæрттæ байгом кодтой аивадуарзджытæн. Бæрæгбон бабæрæг кодта не сфæлдыстадон къорд дæр. Тугъанты Махарбеджы музейы азæлыдысты Мариинаг театры артистты хъæлæстæ. Афтæ райдыдта«Аивæдты `хсæв» музейы равдыстыты залы. Адæмæн сарæзтой æцæг бæрæгбон: равдыстой сын цымыдисаг концертон программæ, зынгонд кинонывтæ, сарæзтой сын музейыл экскурси. Мадзалæн уыд стыр ахадындзинад куыд æрбацæуæг адæмæн, афтæ артисттæн дæр. Уæдæ сæ разыйæ баззадысты музейы кусджытæ дæр. Анастасия Шаповалова, зарæггæнæг: «Азарыдтæн Виолеттæйы ари Джузеппе Вердийы оперæйæ. Тынг мæ фæндыд адæмы базонгæ кæнын йе сфæлдыстадимæ. Абон уымæн тынг хорз фадат уыдис: цымыдисаг нывтæ фенгæйæ рæсугъд зарджытæм байхъусын». Национ зонадон библиотекæйы та уæрæх экраныл адæмæн равдыстой зынгонд кинонывтæ: «Прожить жизнь с Пикассо», «Лето про Виктора Цоя» æмæ «С любовью, Винсент». Кинонывтæ фенæн уыдис лæвар. Олисаты Тамарæ: «Ацы киноныв, æнæмæнг, аивадуарзджыты зæрдæтæм фæндаг ссардзæн, уымæн æмæ йыл 100 фæлтæрдджын нывгæнæгæй фылдæр куыстой. Мæ зæрдæмæ тынг фæцыд. Ахсджиаг уый у, æмæ йæ аивады æхсæвы кæй равдыстой». Национ музейы уазджытæн сарæзтой, цымыдисаг æмæ æмбал кæмæн нæй, ахæм равдыст. Уыимæ ма музейы зæлыдысты джазы уылæнтæ дæр. Музейтæ, библиотекæтæ, культурæйы галуантæ, музыкалон скъолатæ, театртæ æмæ концертон залтæ байгом кодтой сæ дуæрттæ аивадуарзджытæн. Цæгат Ирыстоны цæрджытæй бирæтæ ивгъуыд æхсæв снывонд кодтой аивадæн. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv