«Дорога памяти» акцимæ цæттæ кæнынц Цæгат Ирыстоны

«Дорога памяти» акцимæ цæттæ кæнынц Цæгат Ирыстоны. Ныртæккæ уал нæ республикæйы æмбырд кæнынц сæрмагонд æрмæджытæ, Фыдыбæстæйы Стыр Хæсты чи архайдта, уыдоны тыххæй. Дарддæр сæ арвитдзысты Мæскуымæ. Равæрдзысты сæ иумæйаг сæрмагонд базæйы. Уым уыдзысты хæсты æппæт архайджытæ дæр. Уæрæсейы хъахъхъæнынады министрад цы проект бацæттæ кодта, уый сæрмагондæй цæттæгонд æрцыд Уæрæсейы президенты курдиатмæ гæсгæ. Акци «Дорога памяти»-йы фæрцы цы æрмæджытæ æрæмбырд кæной, уыдон уыдзысты Уæрæсейы гæрзифтонг тыхты аргъуаны галерейы. Акцийы сæйраг нысан у, цæмæй, хæсты амæттаг чи фæци, уыцы хæстонты хиуæттæ сæ хъæбатыры историйы тыххæй бæлвырддæр радзурой. Ныртæккæ алкæмæндæр йæ бон у, йæ хиуæттæй Фыдыстæйы Стыр Хæсты чи архайдта, уыдоны къамтæ арвитын бынæттон æфсæддон коммисариаты постмæ. Уыдон та сæ арвитдзысты сæрмагондæй Мæскуымæ. Уæ зæрдыл ма уын æрлæууын кæндзыстæм, Мæскуыйы парк «Патриот»-ы байгом уыдзæн гæрзифтонг тыхты сæйрагдæр аргъуан Фыдыбæстæйы Стыр хæсты 75 азы юбилеймæ. Аргъуанмæ цы фæндаг цæуы, уый иууылдæр нырыккон технологитæй уыдзæн ифтонггонд, зындзысты дзы хæсты æппæт архайджыты нæмттæ æмæ къамтæ. Николай Русаков, РЦИ-Аланийы æфсæддон къæмисары æххуысгæнæг, булкъон: «Фæнды мæ нæ республикæйы æппæт цæрджытæн дæр фехъусын кæнын, уæлдайдæр кæстæр фæлтæрæн. Нæ ветеранты хъуамæ зонæм æмæ хъуыды кæнæм. Алы бинонтæй дæр Фыдыбæсты Стыр хæстмæ ацыд иу, кæнæ цалдæр адæймаджы. Цæмæй рох ма уой, уый тыххæй дзы цы къамтæ æмæ гæххæтытæ баззад, уыдон алы посты хайадмæ дæр æрбахæссæн ис. Уым сæ оцифровкæ скæндзысты. Стæй сæ дарддæр Мæскуымæ арвитдзысты æмæ сæ гæрзифтонг тыхты аргъуаны сæвæрдзысты. Уыимæ ма, районты военкоматтæм дæр æрбахæссæн ис къамтæ æмæ гæххæтытæ». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv