Рæстдзинад кæм ис?

Æлбегаты Зелим æмæ Сланты Арсенæн ахæстоны фæбадыны тæрхон кæй рахастой, уый æхсæнад сæнкъуысын кодта. Республикæйы цæрджыты фылдæр хай ахæм уынаффæимæ разы не сты. Æхсæнадон архайджытæ расидтысты УФ-йы хъахъхъæнынады министр Сергей Шойгуйы æмæ нæ бæстæйы сæйраг æфсæддон прокуроры номыл фыстæг ныффыссын. Курынц дзы хъуыддагмæ ногæй æмæ биноныгæй æркæсын. Адæмы хъуыдымæ гæсгæ йæ раст нæ равзæрстой, æвдисæнтæ та мæнг сты. Фыстæгыл сæ къух æрæвæрдтой тæрхондоны чи уыд, уыцы адæм. Адæм цыдысты суанг æмбисæхсæвмæ. Къухфыстытæ баисты 3 мины. Абон та уыцы фадат адæмæн уыдис, Ленины номыл фæзмæ æрбацæугæйæ. Æхсæнадон архайджытæ, ахст лæппуты æмбæлттæ æмæ хиуæттæ адæммæ фæсидтысты социалон хызæгты дæр. Сидынц алкæмæ дæр рæстдзинады тыххæй сæ къухтæ æрæвæрынмæ. Мадзал аразджытæ фæнд кæнынц абон 10 мин къухфысты сæмбырд кæнын. Хæстæгдæр 2 боны къухфыстытæ æмбырдгæнæн пункттæ уыдзысты Ленины фæзы, БАМ-ы, уæлдæр скъолаты æмæ республикæйы районты. Цæгатирыстойнаг лæппутæн куыд тæрхон кодтой, уый айхъуыст алы горæттыл. Æхсæнадон хъахъхъæнæг Тезиаты Оледжы ныхæстæм гæсгæ, къухфыстытæ æмбырд кæнынц Хуссар Ирыстоны, Мæскуыйы, Санкт-Петербурджы, суанг ма Италийы дæр. Раст тæрхоны фарс чи хæцы, уыдонмæ æнхъæлмæ кæсынц Цхинвалы — Театралон фæзы, Санкт-Петербурджы — Ленины æмæ ЛИговскаг проспектты, Мæскуыйы — Спортивон метройы æмæ адæмон хæдзарады сгуыхтдзинæдты равдысты. Уæдмæ та ирыстойнаг сержантты хъахъхъæнджытæ аппеляцийæн æмбæлгæ гæххæттытæ цæттæ кæнынц. Æркæсдзысты йæм æфсæддон тæрхондоны Ростовы. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv