Карантин адæргъвæтин кæндзыты, æви нæ?

Æхснырсæг æмæ гриппы уавæр фæрогдæр Хуссар Ирыстоны. Уый тыххæй фехъусын кодтой республикæйы фæлхасгæнджытæм цæстдарды управленийы. Уый хынцгæйæ, фæбæрæг кодтой карантин кæй нæ адæргъвæтин кæндзысты, уый. Ома, 22-æм январы Хуссар Ирыстоны карантины цы скъолатæ æмæ рæвдауæндæттæ сæхгæдтой, уыдон райдайдзысты кусын 10-æм февралы. Уыцы бонмæ карантин ахæсдзæн Цæгат Ирыстоны дæр. Фæлæ ам уавæр цы хуызы у, уый нырма сфæлхат кæнын хъæудзæн. Уый тыххæй бæрнон кусджытæ профилон ведомствотæй 10-æм февралы сараздзысты радон мониторинг. Уый цы бæрæггæнæнтæ равдиса, уымæ гæсгæ рахæсдзысты уынаффæ, карантины фæтк дарддæр уыдзæн, æви нæ. Уæ зæрдыл уын æрлæууын кæндзыстæм, Фæлхасгæнджытæм цæстдарды управлени снысан кæны карантин, ахуырдзауты 20% сæхиуыл æхснырсæджы миниуджытæ куы банкъарынц, уæд. Бафтаудзыстæм ма уый æмæ карантин Цæгат Ирыстоны снысан кодтой æппæт рынчындæтты дæр. Ахæм уынаффæ рахаста республикæйы æнæниздзинад хъахъхъæныны министрад. Афтæмæй, пациентты бæрæг кæныны бар нæй хиуæттæн æмæ бинонтæн. Карантин расидтысты цæмæй æхснырсæг æмæ гриппы рынчын адæмы нымæц ма фæфылдæр уа. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv