Æрдз æртхъирæн кæны

Знонæй нырмæ Дзæуджыхъæуы æмæ нæ республикæйы кæцыдæр районты кæны тыхджын дымгæ. Уый аххосæй хъыгдард баййæфтой бирæуæладзыгон хæдзæртты сæртæ. Горæты кæцыдæр уынгты дымгæ рафæлдæхта бæлæстæ дæр. Иуæй-иутæ дзы æрхаудысты хæдтулгæтыл дæр. Ныридæгæн æрдзон фæзынды фæстиуджытæ аиуварс кодтой. Дымгæ фæсабыр уыдзæн, æви нæ æмæ цавæр уыдзæн хæстæгдæр бонты боныхъæд? Тыхджын дымгæ Дзæуджыхъæуы æрцыд знон изæр. Цоколаты Геннадийы номыл уынджы, 18 хæдзары цæрджыты тынг бахъыгдæрдта. Ам дымгæ рафæлдæхта дыууæ зæронд заз бæласы. Æрхаудысты бынæттон цæрджытæй иуы хæдтулгæйыл. Ныцъæл æй кодтой. Адæмы ныхæстæм гæсгæ, бæлæстæ сты зæронд, æмæ иу æмæ дыууæ хатты нæ бахастой сæ курдиат, цæмæй сæ алыг кæной. Дзæуджыхъæуы бынæттон хиуынаффæйады æхсæвæй нырмæ дымгæ цы зиан æрхаста, уымæ кæсынц. Райсомы 9 сахатмæ мэрийы райстой 40 курдиатæй фылдæр. Адæмæн сæ фылдæр хъаст кодтой, электрон тых сæм кæй нæй, ууыл. Бирæ рæтты телтæ аскъуыдысты. Уымæй уæлдай ма дымгæ цалдæр хæдзарæн сæ сæртæ систа. Ацы фарстатæ ныридæгæн иууылдæр аиуварс кодтой. Дзæуджыхъæуы гидрометеорологон центры бæрæггæнæнтæм гæсгæ æхсæвы дымгæй тых уыд 16 метры иу секундмæ. Специалисттæ ма бафиппайдтой, дымгæ нæ республикæмæ уазæлттæ кæй æрбахæсдзæн. Синоптикты ныхæстæм гæсгæ, хæстæгдæр рæстæг дымгæ æрсабыр уыдзæн. Фæлæ æрбахæсдзæн мигъ æмæ уарынтæ. Кæцыдæр районты фæндæгтæ æрсæлдзысты. Уымæ гæсгæ, специалисттæ сидынц шофыртæм, цæмæй æдасдзинады домæнтæ æххæст кæной. Гогаты Марат _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv