Битарты Вячеслав ма кусæг балцы ацыд Мæздæджы районмæ дæр

Цæгат Ирыстоны сæргълæууæг Битарты Вячеслав абон кусæг балцы уыд Мæздæджы. Фембæлд районы минæвæрттимæ. Уымæй уæлдай ма бабæрæг кодта, дзидзайæ хойраг чи уадзы, ахæм бынæттон куыстуат дæр. Ацы кадртæ ист сты къалбастæ уадзыны рæстæг. Дзидзайы ссæст дзы аразынц. У сæйраг цех. 10 азы куыстуат аразы ахæм продукци. Æдæппæтæй - 100 хуызы. Æрдæгфабрикаттæ, зæгъгæ, уыдон, алыхуызон стæм хæринæгтæ æмæ æндæртæ. Кусынц ласгæ хом дзидзаимæ. Битарты Вячеславы ныхæстæм гæсгæ, республикæйы хъæууонхæдзарадон къабазæн уый хорз ахъаз у. Иу мæймæ ам цæттæ кæнынц 100 тоннæйы продукци. Фæзминаг бæрæггæнæн. Агропромышленнон равдысты Мæскуыйы æрæджы бацахстой фыццаг бынат. Ныр архайынц куысты фæрæзтæ рапарахат кæныныл. Райдыдтой уал цалцæггæнæн куыстытæ кæнын. Зæгъæн ис, æмæ сæ ног офис цæттæ у, ног уæлæмхасæн бæстыхæйттæ дæр уæдæ аразынц. Уый тыххæй балхæдтой ног кусæнгæрзтæ. Дзуапп дæтдзысты нырыккон домæнтæн. Куыстуаты разамонæг Владимир Богачевы ныхæстæм гæсгæ, ныртæккæ йæм кусы 100 адæймагмæ ввахс. Фидæны й` авналæнтæ фæуæрæхдæр кæндзæн. Завод æййафы зындзинæдтæ дæр. Баст сты газæй ифтонгадимæ. Республикæйы сæргълæууæг зæрдæ бавæрдта баххуыс кæнынæй. Мæздæджы районы разамындимæ Битарты Вячеслав бахæс кодта æмбæлгæ кусæндæттæн уыцы хъуыддагмæ `ркæсын. Æмбырды ма дзырдтой æнæниздзинад хъахъхъæныны, ахуырад æмæ хъæууон хæдзарады тыххæй. Ахсджиаг фарста - зæххыты кадастрон аргъ дæр. Фæндæгты уавæрмæ - сæрмагонд цæстдард. Республикæйы сæргълæууæджы амындмæ гæсгæ, иннæ аз республикæйы фæндæгты фондæй Мæздæджы районæн радих кæндзысты 200 милуан сомы. Куыстытæ чи кæндзæн, уый хъуамæ, æнæмæнг, уа Цæгат Ирыстонæй. Депутаттæн æмæ районты хицæуттæн Битарты Вячеслав бабар кодта æнгомæй æмæ биноныгдæрæй кусын. «Ирыстоны намыс»-ы майданæй Битарты Вячеслав схорзæхджын кодта Мæздæджы районы раздæры сæргълæууæг Вячеслав Париновы. Нырæй фæстæмæ ма уый уыдзæн Мæздæджы кадджын цæрæг дæр. Районмæ республикæйы хицауад сæрмагонд цæст дары. Бирæ кусинæгтæ дзы ис. Куыд сыл архайдзысты, уый та Битарты Вячеслав бакодта йæхи бæрны. Хъулаты Юрий _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv