Аив æй кæнынц

Кировы номыл уынджы цы фонтан ис, уый сæрды райдианмæ сног кæндзысты. Цалцæггæнæн куыстытæ дзы сæ тæмæны бацыдысты. Дзæуджыхъæуы администрацийы сæргълæууæг Æлбегаты Барис, куыстытæ куыд цæуынц, уый сбæрæг кодта бынаты. Æрныхас кодта арæзтадон куыстуаты разамонæгимæ. Горæты сæргълæууæгæн равдыстой фонтаны æмæ, йæ амфамблай цы фæз ис, уый сног кæныны проект. Уæ зæрдыл уын æрлæууын кæндзыстæм, 2001-æм азы йæ куы сарæзтой, уæдæй нырмæ дзы цалцæггæнæн куыстытæ нæ уыдис. Ныридæгæн уал фæзыл бордюртæ сæвæрдтой, уадзынц дзы рухстæттæн системæйы телтæ. Цалцæггæнæн пъланмæ гæсгæ, фонтаны хæйттыл бакусдзæнис сæрмагонд къорд. Ацы хъуыддаджы фæдыл хъуамæ ссæуой Дзæуджыхъæумæ. Композицийы æддаг бакаст дæр фæаивдæр кæндзысты. Фæзындзæн ма дзы ног бандæттæ дæр. Уæ зæрдыл уын æрлæууын кæндзыстæм, фонтаны цалцæггæнæн куыстытæ ивгъуыд азы майы кæй райдыдтой. Уæд горæты хицауад зæрдæ бавæрдта, ацы аз сæ кæронмæ кæй ахæццæ кæндзысты. Бафтаудзыстæм ма уый, куыстыты тыххæй бюджет кæй ничи равдæлон кодта. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv