Мэҥэ таас туруоруута

Муус устар 18 кунэ – Аан дойдутааҕы пааматынньыктар уонна историческай суолталаах миэстэлэр күннэрэ. Бу күҥҥэ дьүөрэлии Нам улууһугар историческай суолталаах бэлиэ күн үүннэ. Ол курдук, биир дойдулаахпыт, биллиилээх политик, бөдөҥ деятель Илья Егорович Винокуровка анаммыт Мэҥэ Таас кини төрөөбүт сиригэр, Ойоҕос Арыытыгар Балаҕан Хонуута диэн сиргэ турда. Үйэлээх тааһы Илья Винокуров төрүттээбит Өлөөн улууһуттан аҕалан олохтоохтук уурдулар. Ыраах сиртэн тааһы булууга, аҕалыыга Хатыҥ Арыы нэһилиэгин дьаһалтата, Өлөөн улууһун уонна Харыйалаах нэһилиэгин дьаһалтата үлэлэстилэр. Тиэйтэрэн аҕалыыга предприниматель Владислав Соловьев көмөтө улахан. Дмитрий Михайлович Елисеев ымпыгар - чымпыгар тиийэ чочуйан таһаарда. Мэҥэ бэлиэ турбут сиригэр алҕааһын сиэрэ-туома оҥоһулунна. Мустубут дьон иһигэр Илья Егорович төрөппүт уола СР авиациятын бэтэрээнэ Валерий Винокуров кыттыыны ылла уонна олоҕун тухары кырдьыгы турууласпыт тапталлаах аҕатын утүө аатын үйэтитэр үлэ ыытылларын иһин махталын биллэрдэ. Үйэлээх ситим буолан үйэлэргэ кэрэхсэнэ турдун диэн баҕа санаатын эттэ. Тэрээһин кыттыылаахтара норуоттан тахсыбыт чулуу уол Илья Винокуров сырдык аатыгар сүгүрүйэн тыыннаах сибэкки дьөрбөтүн уурдулар.