Хуыздæр фестут!

Цæгат Ирыстоны æппæтуæрæсеон адæмон фронты уæнгтæ бабæрæг кодтой рæвдауæндæттæ. Канд Дзæуджыхъæуы нæ, фæлæ ма республикæйы районты дæр. Адæмон фронты экспертты ныхæстæм гæсгæ, аиуварс кæнинаг фарстатæ ис. Цавæртæ, уый базыдта нæ уацхæссæг. Æппæтуæрæсеон адæмон фронты уæнгтæ сæ радон балц райдыдтой станицæ Николаевскæйы сывæллæтты рæвдауæндонæй. Арæзт æрцыд 50-ай азы размæ. Сывæллæтты хъазæн фæзыл уайтагъд цæст æрхæцы. Æрвылаз æм хорз базилынц, сцалцæг æй кæнынц, фæлæ йæ гæрзтæ сты уæддæр хуыздæрхъуаг. Администрацийы уæнгтæ куыд зæгъынц, афтæмæй сæ сывæллæтты æнæ хъазæн мадзæлттæй ныууадзын нæ фæнды. Уымæ гæсгæ, сæхи хъаруйæ сывæллæттæн хъæугæ уавæртæ аразынц. Сывæллæтты рæвдауæндоны сыгъдæгдзинадмæ кæсынц сæ мадæлтæ. Цалцæггæнæн куыстытæ фæкæнынц сæхи хъаруйæ. Фæлæ дзы вæййы ахæмтæ, æмæ æнæ администрацийы уæнгты æххуысæй кæй нæ бакæндзысты. Зæгъæм, арæзтадон ифтонггæрзтæ саразын. 1965-æм азæй нырмæ сæ ничи раивта. Мæ хистæр чызгыл цæуы 19 азы, кæстæрыл та 4. Уæдæй-нырмæ сывæллæтты рæвдауæндонмæ зилæм нæхæдæг. Хъазæнтæ æмæ рудзынгæмбæрзæнтæ нæхæдæг æлхæнæм. Ног азмæ та нын заз бæлас балæвар кодтой амалджынтæ. Ахæм зын уавæры ма ис Къора-Урсдоны сывæллæтты рæвдауæндон "Березка". Сывæллæттæ кæм хъазой, уыцы фæзæй цух сты, сæ доны хæтæлтæ дæр - æрдæгкæндтытæ. Цæмæн афтæ у, уый бынæттон администрацийы бон фæбæлвырд кæнын нæ бацис. Фæлæ бархионтæ сæхи хъæппæрисæй бæстыхаймæ базылдысты, цæмæй рæвдауæндон бынтон заууатмæ ма `рцæуа. Ахæм басгæрстытæ Æппæуæрæсеон адæмон фронты уæнгтæ арæх саразынц. Сæ ныхæстæм гæсгæ, дарддæр архайдзысты, цæмæй сывæлæттæн хъæугæ уавæртæ саразой. Фидæнмæ сæм пълæнттæ бирæ ис. Зæрдæ дарынц, æххæстгонд кæй æрцæудзысты, ууыл. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv