Джелыты Радик архайы æппæтуæрæсеон конкурс «Адæмон участковый» йы

Уæрæсейы райдыдтой æвзарын пъæлицæйы хуыздæр æххæстбарджын минæвары. Æрвылазон конкурс «Адæмон пъæлицæйаг - 2019» аразынц мидхъуыддæгты министрады хъæппæрисæй. Нæ республикæйы цæрджыты бон у раттын сæ хъæлæс архайджытæй иуыл. Уый та у нæ конкурсы республикон къæпхæны чи фæуæлахиз уый. Æппæты фылдæр хъæлæстæ æрæмбырд кодта Мæздæджы районы участковый. Ныр та Цæгат Ирыстоны кад хъахъхъæндзæн конкурсы кæронбæттæн къæпхæны. Æппæтуæрæсеон конкурс «Адæмон участковый» -йы Цæгат Ирыстон архайдзæн Мæздæджы районы пъæлицæйы хайады участокмæ æххæстбарджын цæстдарæг Джелыты Радик. Пъæлицæйаджы дæсныйад Джелыты бинонтæм у кадджын. Барадхъахъхъæнæн куыст кодтой йæ фыд, фыды фсымæр, йе `фсымæр. Иууылдæр систы разамонджытæ. Джелыты Радик, Мæздæджы районы пæлицæйы хайады участокмæ æххæстбарджын цæстдарæг: «Хъуыды кæнын мæ фыды формæ фыццаг хатт мæхиуыл куы æрбакодтой, уый. Уæд, фондзаздзыд лæппуйæ зыдтон мæнæн дæр ахæм формæ кæй уыдзæн æмæ мидхъуыддæгты министрады кæй кусдзынæн, уый. Адæмы æдасдзинад хъахъхъæнын мæ фæндыд мæ сабибонтæй». Радик куыд зæгъы, афтæмæй - уый у æппæтæй стырдæр æмæ ахадгæдæр куыст. Кæд арæх адæмимæ кусын æнцон нæу, уæддæр Мæздæджы районы арæхсы алкæй зæрдæмæ дæр фæндаг ссарын. Адæмон участковый архайы йæ участоччы барадхæлдтытæ ма `руадзыныл. Хаттæй-хатт афтæ рауайы æмæ йæ бæрны цы административон участок ис уым æргъай кæсаг æнæзакъонæй чи ахсы, уыдонимæ тох кæнын. Джелыты Радик, Мæздæджы районы пæлицæйы хайады участокмæ æххæстбарджын цæстдарæг: «Нæ сæйраг хæс у Терчы дон цы биологон ресурстæй хъæздыг у, уыдон бахъахъхъæнын. Тох кæнæм кæсагахджытимæ. Æргъай кæсаг у Сырх Чиныгмæ хаст. Байсæм сын электрон æнгуыртæ. Уыдон æрдзæн хæссынц стыр зиан. Точы аххосæй кæсаг иууылдæр амæлы. Æз æрдз бирæ уарзын, мæ фæлладуадзæн бонтæ дæр арвитын æрдзы хъæбысы. Кæд кæсаг фæахсæм уæддæр ахæм æбуалгъ хуызы нæ». Йæ хорз куысты тыххæй Джелыты Радик æрвыст æрцыд æппæтуæрæсеон конкурс «Хайады адæмон пъæлицæйаг»-мæ. Йæ бæрны чи ис уыцы бынæттон цæрджытæ пъæлицæйы капитаны куыстæй разы сты. Мæздæджы районы цæрджытæ куыд зæгъынц, афтæмæй Джелыты Радик конкурсы финалмæ кæй рацæудзæн, ууыл дызæрдыг дæр нæ кодтой. Ныр та сæ ныфс ис Æппæтуæрæсеон конкурсы дæр кæй фæуæлахиз уыдзæн, уымæй. Фыццаджыдæр йæ ныхасæн у хицау. Зæгъæм исты курдиат мæм фæзынд уæд мын цы бонмæ зæгъа, уыцы боны мгъуыдмæ, хатгай та раздæр мæ фарста лыггонд æрцæуы. Алы куыст дæр æххæст кæны кæронмæ. Бæрнон куыст ын кæй у уый хорз æмбары. Зæрдæхæлар адæймаг у, фæлмæн ныхасæй фæндаг ссардзæн хистæртæм дæр æмæ кæстæртæм. Ахæм адæмон участковый у фæзминаг. Цы хæс ын бабар кæнай уый æнæ дзуаппæй нæ ныууаддзæн. Адæмон пъæлицæйагæн онлайн хъæлæс раттыны бар уыдзæн газет «Комсомольская правда»-йы сайты. Хъæлæс кæныны фадат уыдзæн 1-æм ноябрæй 9-æммæ. Кадджын мадзалы сæйраг приз чи рамбулдзæн уый та сбæрæг кæндзысты 15 -æм ноябры, адæмон пъæлицæйæгты профессионалон бæрæгбоны хæдразмæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv