15 аздзыд Кæркуысты Астан хъæдæрмæгæй аразы цымыдисаг дзаумæттæ

Дигорайы цæрæг, 15-аздзыд Кæркуысты Астан хъæдæрмæгæй аразы цымыдисаг дзаумæттæ. Бандæттæ, стъæлттæ, хæцæнгæрзтæ, хъæдын нывтæ. Æрыгон æрмдæсныйы арæхстдзинады кой айхъуыст æнæхъæн Дигорайыл дæр. Æрвылбон æм фæзыны бирæ курдиаттæ. Кæркусти Астани къохти гъæдæй рауайуй алихузи дессаг дзаумæуттæ. Али листæгдзинадтæбæл дæр бакосуй зæрдиагæй. Фиццаг бал гъæдæн æ уæлцъарæ исесуй. Уой фæсте ба йæ бæрцæмæ гæсгæ рабаруй æмæ ралух кæнуй. Гъæди кустбæл биццеуи фæцалх кодта йæ баба æма скъолай фæллойи ахургæнæг. Сабургай Астанмæ æхе косæнгæрзтæ дæр фæззиндтæй. Æхе къохтæй искодта, чи верстакбæл косуй, уой дæр. Æригон æрмдæснийæн æ куститæй еу, Уасгергий устур нивæ, нуртæкки лæууй Дигоргоми ковæндони. Йæ али кусти дæр баивæруй йæ уод. Нуртæкки ба косуй Нарти кувдбæл. Фæйдта æй сæ синхæнттæмæ ма исфæнд кодта æхе къохæй исаразун. Устур æмæ зин аразæн æй. Фал имæ уæддæр Астан æ нифсæ бахаста. Нур бал хузтæ гъæдæбæл къариндасæй искодта. Астан куд дзæгъуй, уотемæй ма нарти кувдбæл лæмбунæгæй гъæудзæнæй анзи дæргъи бакосун. Йæ куститæй уодзæнæй æгасемæй устурдæр. Нур 6 анзи дæргъи Астан æхе къохтæй аразуй стъолтæ, къелатæ, алихузон зæрдæбæлдарæн лæвæрттæ. Али хатт дæр æвзаруй нæуæг дзаумæуттæ аразунбæл. Йæ кустити фулдæр хай хæдзари изайгæ дæр нæ кæнунцæ. Адæмæн æнцæ зæрдæмæдзæугæ. Куд идарддæр, уотæ Астани арæхстдзийнади туххæй фулдæрæй-фулдæр адæм базудтонцæ. Али бон дæр имæ Дигори али къумтæй курдиаттæ цæунцæ. Хатгай йин рæстæг дæр нæ фæфагæ кæнуй, цæмæй се 'гасебæл дæр бакоса. Федæнмæ ма æригон æрмдæснимæ берæ фæндтæ ес. Фиццагидæр бал, æ косæн бунат фæххуæздæр кæнун. Скъолай фæсте Астан фæндæ кæнуй архитектури факультетмæ бацæун. Цæмæй йæ зæрдæмæ чи куст цæуй, уоми йæ арæхстдзийнадæ уæлдæр кæна. Æма йæ къохи ке бафтуйдзæнæй, йе дузæрдуккаг нæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv