Криминалисттæн кад

Абон сæ профессионалон бон бæрæг кæнынц эксперттæ-криминалисттæ. Сарæзтой йæ 1919 азы, тæргæйтты мæйы 1-æм бон. Уæдæй абоны онг æххуыс кæнынц фыдгæнджытимæ тох кæнынæн. Уымæн сын бирæ фæрæзтæ ис. Цы техникон фæрæзтæ æмæ æрхъуыдыдзинæдтæй пайда кæнынц, уыдон кæйфæнды дæр дисы бафтаудзысты. Æппæт сусæгдзинæдтæ никæмæн схъæр кæндзысты. Мидхъуыддæгты министрады экспертон-криминалистон центр бирæ азты архайы закъонхалджыты фыдракæндтæ рабæрæг кæныныл æмæ сын сæ аххоссæгтæ раиртасыныл. Экспертизæйы рæстæг цавæр сусæгдзинæдтæй пайда кæнынц, уыдон æрмæстдæр сæхæдæг зонынц. Сæ æвæллад кусты æмæ хорз бæрæггæнæты тыххæй экспертон-криминаллон центры куысджыты абон схорзæхджын кодтой æвдисæндартæй æмæ алыхуызон хæрзиуджытæй. Къухы фæдтæм гæсгæ фыдгæнæджы базонын — криминалистты раз ахæм хæстæ лæууынц. Абон бæрæг кæнынц сæ профессионалон бæрæгбон. Фæлæ сæ уый сæ куыст æххæст кæнынæй нæ уæгъд кæны. Сæ зонындзинæдты æмæ фæлтæрддзинады фæрцы республикæйы эксперттæ кæнынц бирæ хуызты экспертизæтæ. Ацы аз нырыккондæр анализтæ æмæ технологитæй пайдагæнгæйæ фæнд кæнынц сæ куысты бæрæггæнæнтæ ноджы фæхуыздæр кæнын. Иннæ ногдзинæдты æмхуызон ныр пайда кæндзысты психофизиолгон æмæ товароведонтæй. Лабораторон центры кусынц къабæзтæм гæсгæ. Зæгъæм, баллистикон лабораторийы хæцæнгæрзтæн æмæ наркотиктæн экспертизæтæ кæнынц. Рабæрæг кæнынц фыдгæнæг куыд æхста, цавæр хæцæнгарзæй æмæ æндæр хъæугæ информаци. Арæх сæм зын хъуыддæгтæ дæр бахауынц, фæййы афтæ æмæ сыл фылдæр рæстæг ахъуыды кæнын бахъæуы. Фæлæ фæлтæрдджын специалисттæ цыфæнды хъуыддаг дæр раргом кæндзысты. Автотехникон лаборотори дæр дисы фтауы. Фæндаггон фыдбылызты рæстæг эксперттæн цæлхытæ, æвгтæ æмæ рухсгæнæнтæ сæ кусæн дзаумæттæ свæййынц. Куыст бирæвæрсыг у, фæрдгуытау æмбырд кæнынц æрмæджытæ, иртасынц сæ. Рæмудзæн æрмæджытæ бæрæггæнæн лабораторийы куыст никуы æрлæууы. Иртасынц срæмыгъдытæ, Фыдыбæстæйы Стыр Хæсты рæстæгй ма цы хæцæнгæрзтæ ссарынц, уыдон. Зæгъæм 2010 азы нæ республикæйы, Дзанайы-йырты уынджы цы срæмыгъд уыд, уый фæстиуджытæ раиртасыныл бакуыста ацы хайады экспертты къорд. 2015 азы кæрон ма центры байгом кодтой ДНК-лаборатори. Ифтонг у хъæугæ æмæ нырыккон домæнтæм дзуаппдæттæг кусæнгæрзтæй. Ацы лабораторийы кусынц 6 адæймаджы. Ныр фыдгæнæджы туджы æртахмæ, кæнæ сæрыхъуынмæ гæсгæ эксперт базондзæн цы йæ хъæуы, уыцы информаци. Алы аз, алы бон гæххæтытимæ кусæг адæймаг йæ къухфыст кæм нæ ныууадзы, ахæм нæй. Закъонхалæгæн дæр мæнг къухфыст рæвдз амыхуыр кæны. Уымæй тагъддæр та йæ эксперт раиртасы. Фæстаг рæстæг ма фылдæр цæстдард здахынц нозты продукцимæ. Уымæн сын æххуыс сæрмагонд аппарат — хромотограф. Йæ фæрцы сбæрæг кæнынц нозт цы буарыгъæдтæй конд у, уый. Цæгат Кавказы федералон зылды ахæм экспертон центрæн æмбал нæй. Алцæмæй æххæст лаборатори бирæ азтæ хуыздæр мадзæлттæй аразы йæ куыст æмæ архайы цауты райхалыныл. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv