Патриотон клуб «Родина» -йы уæнгтæ бахатыдысты Уæрæсейы президентмæ курдиатимæ

Патриотон клуб «Родина» -йы уæнгтæ бахатыдысты Уæрæсейы президентмæ курдиатимæ, цæмæй Сæлбиты Верæйæн радтой Уæрæсейы хъæбатыры ном.  Сæлбиты Верæ уыд Фыдыбæстæйы Стыр хæсты ветеран. Йæ хъæбатырдзинад равдыста бастдзинады ротæйы службæ кæнгæйæ. Августы мæй, 1941 азы немыцы десант советон цæдисы дæлхайæдты фæсчъылдыммæ æрбадт. Афтæмæй знаг 5-æм механизацигонд корпусæн Днепрмæ йæ фæндаг акъуырдта. Сæлбиты Вера уавæр куы бамбæрста, уæд айтæ-уйтæ нал фæкодта æмæ советон салдæтты сразæнгард кодта ныббырстмæ. Хистæр лейтенанты руаджы æфсæддонтæ атындзыдтой размæ. Тугкалæн тохы рæстæг знаджы æрдонгтæ саст æрцыдысты. Уыцы сгуыхтдзинады фæстæ Сæлбиты Верæйæн хъуамæ радтаиккой Советон Цæдисы хъæбатыры ном. Уый тыххæй сæрмагондæй курдиат балæвæрдта 20-æм æфсады инæлар-лейтенант Михаил Лукин. Фæлæ, хъыгагæн, афтæ рауад æмæ Сырх Æфсады салдæтты документтæ сæфт æрцыдысты, Михаил Лукин та цæф æрцыд æмæ немыцæгтæм уацары бахауд. Дыккаг хатт та Сæлбиты Верæйы стыр хæрзиуæджы аккаг скодта 229 -æм дивизийы командыгæнæг Михаил Козлов. Фæлæ та уæддæр, Верæйæн нæ бантыст йæ майдан райсын. Схорзæхджын æй кодтой Сырх Тырысайы орденæй. Ацы хатт патриотон клуб «Родина» -йы уæнгтæ зæрдæ дарынц, уæрæсейы президент аккаг аргъ кæй скæндзæн цæгат ирыстойнаг сылгоймаг-хъæбатырæн. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv