Йæ кусæг балц Азат Кадыров райдыдта егъаудæр спортивон объекттыл афæлгæстæй. Фыццаджыдæр, бабæрæг кодта стадион «Спартак». Ныртæккæ ам цæуынц аивгæнæн куыстытæ, бадæн бынæттæн бетонæй конструкцитæ аразынц. Министры хæдивæг фæнысан кодта, аренæ кæронмæ æнæмæнг кæй сараздзысты. Дарддæр - спортивон хъæбысхæсты тренировкæгæнæн центр Дзæуджыхъæуы, фидæны физкультурон-дзæбæхгæнæн комплекс «Клеверспор»-ы фæзуат, ленкгæнæн бассейн æмæ æхгæд футболон манежимæ физкультурон-дзæбæхгæнæн комплексы арæзтадон фæзуæттæ микрорайон «Ног горæт»-ы, стадион «Пищевик» Беслæны æмæ спортивон фæз Сунжæйы. Дарддæр уыд кусæг æмбырд. Ныхас цыд национ проект «Демографи»-йы федералон программæ «Спорт - царды нормæ»-йыл. Дзанайты Барис фæнысан кодта, республикæ хъуыстгонд кæй у йæ спортивон æнтыстытæ æмæ профессионалон тренертæй. Абон æппæт районты дæр ис физкультурон-дзæбæхгæнæн комплекстæ, гом арвы бын фæзтæ. Уæлдай æргом здæхт цæуы федералон проект «Бизнес-спринт (Æз æвзарын спорт)»-мæ. Йæ æууæлтæй иу – «зондджын» фæзты арæзтад. Азат Кадыровы ныхæстæм гæсгæ, республикæйы цы проектæ æххæстгонд цæуынц, уыдоны райрæзтæн дзуапдæттæг министрад дарддæр æххуыс кæндзæн. Ацы аз Дзæуджыхъæуы райдайдзысты аразын нырыккон комплекс – фиджитал-центр.  Классикон æмæ нымæцон спорты хуызты арæхстдзинадыл кусынæн дзы уыдзæн иумæйаг фæзуат. Ифтонггонд фæзуæттæ, хицæн бынæттæ компьютерон хъæзтытæн æмæ виртуалон æцæгдзинадæн. Азат Кадыров фæбæрæг кодта Цæгат Ирыстоны разамынды ахадгæ архайд. Фæстæдæр Дзанайты Барис архайдта Азат Кадыров æмæ Уæрæсейы физкультурæ æмæ спорты къабазы инвесторты ассоциаци «Прорыв»-ы президент Евгений Вайнеры бизнес-фембæлды хицæн инвестортимæ. Ныхас цыд паддзахад ӕмӕ хицӕн адӕймӕгты ӕмгуыстадыл, фехъусын кодтой райхалинаг фарстатæ, кæрæдзийæн фæхай кодтой сæ зонындзинæдтæ æмæ фæлтæрддзинадæй. Ацы аз Дзæуджыхъæуы райдыдтой æххæст кæнын физкультурон-дзæбæхгæнæн комплекс «Клеверспорт»-ы арæзтад. Проекты аргъ - 738 млн сомы. Уыдонæн се 'рдæг ратдзæн хицæн партнер, иннæ хай баххæст кæндзысты федералон æмæ республикон бюджеттæй. Объекты руаджы, спортæй æппынæдзух чи архайы, ахæм адæмы нымæц зынгæ фæфылдæр уыдзæн. Хатдзæгтæ кæнгæйæ, æмбырды архайджытæ баныхас кодтой дарддæры æмгуыстадыл. Пълæнттæ егъау сты, æмæ сæ райрæзтæн æппæт гæнæнтæ дæр ис. Сæйраг нысан, раздæрау, у - республикæйы цæрджытæн спортæй архайынæн аккаг уавæртыл кусын æмæ æнæниз цардыуагмæ адæмы æмхиц кæнын. Паддзахады æххуысы руаджы уый къухы æнцондæрæй бафтдзæн.