Сергей Меняйлойы разамындæй уыд оперативон штабы æмбырд. Ныхас цыд Запорожьейы облæсты Черниговы районы бынæттон хиуынаффæйады оргæнтимæ æмгуыстадыл. Республикæйы сæргълæууæг райдианы фæнысан кодта, Уæрæсейы регионтæ президент Владимир Путины бардзырдмæ гæсгæ, ӕххуысӕй фӕкӕсдзысты бӕстӕйы ног территоритӕм. Цæгат Ирыстон алывæрсыг æххуыс кæны Запорожьейы облæсты Черниговы районæн. «Ныридæгæн къухы бирæ бафтыд. Районмæ арвыстой цæрджытæн дон ласынæн хæдтулгæ. Организацитæн балхæдтой сæрмагонд дзауматæ инвалидтæн. Хъæу Черниговкайы цæуы аргъуаны цалцæг. Уæдæ сæрдыгон дзæбæхгæнæн компанийы фæлгæты Цæгат Ирыстон суазæг кодта Запорожьейы облæстæй 120 сывæллоны. Æдæппæтæй регионмæ уырдыгæй улæфынмæ ссæудзæн 750 сабийы. Геронтологон центры дзæбæх кæнынц 24 адæймаджы. Регионы инфраструктурæ сног кæныны пълан 2023-2025 азтæм у цæттæ», - загъта Сергей Меняйло. Документмæ гæсгæ сцалцæг кæндзысты æртæ скъолайы æмæ иу рæвдауæндон. Сног кæндзысты поселок Черниговкайы канализацион системæ. Ссыгъдæг кæндзысты æмæ раивдзысты артезиайнаг скважинæйы ифтонггæрзтæ. Республикæйы сæргълæууæг бабар кодта цыбыр рæстæгмæ Черниговы районмæ арæзтадон техникæ æмæ æрмæджытæ аласын, стæй кусджыты бригадæтæ арвитын. Транспорт æмæ фæндаггон хæдзарады комитет хъуамæ фæкæса автомобилон фæндæгтæ сцалцæг кæнынмæ. Ахуырад æмæ наукæйы министрадæн бабар кодта скъолаты ахуырадон процессмæ æркæсын.