Поселок «Молодежный»-йы цæрджыты сæ хъысмæт тыхсын кæны

Джызæлмæ ввахс коттеджты поселок аразын райдыдтой федералон программæмæ гæсгæ. Поселок уыдис «Дирекция жилищных строительных программ», зæгъгæ, уый бæрны. Проект куыста цыппар азы, 2003-æмæй 2007-мы онг. Пъланмæ гæсгæ дзы фатертæ хъуамæ райстаиккой 168 фæкæсынхъуаг æрыгон бинонтæ. Фæлæ уый се `ппæтæн сæ къухы нæ бафтыд. Сертификаттæ цы хуызы лæвæрдтой, уый адæм абон дæр не `мбарынц. Цымæ йæ не сфæлдыстадон къорды уæнгтæ та бамбæрстой, æви нæ? Джызæлмæ `ввахс фæсивæдон поселоччы ис 107 хæдзары. Сæрмагонд гæххæттытæм гæсгæ, Джызæлы скондмæ хауынц. Фæлæ æцæгæй уавæр бынтон афтæ нæу. Беккуызарты Тамерлан ам хæдзар балхæдта. Ныр дзы æрцæра, зæгъгæ, афтæ йæ къуылымпытæ дæр бабирæ сты. Поселоккæн зæхх радих кодтой 22 гектары. Хæдзæрттæ арæзт сты хъæндзинæдтимæ. Æмæ ма ууыл бæллæхтæ куы фæуиккой. Зæрдæхсаинаг у сæ гæххæттыты рæстдзинад дæр. Ацы арæзтадон программæйæн 2016-æм азæй фæстæмæ разамынд дæтты Бесолты Зойæ. Архайы хъуыддаг фæхуыздæр кæныныл. Йæ размæ ис бирæ райхалинаг хъуыддæгтæ. 168-æй 107 бинонтæ хæдзæрттæ раджы райстой. Коттедж балхæныны бадзырд та бафыстой «Банк развития региона», зæгъгæ, уый æххуысæй. Бесолты Зойæйы ныхæстæм гæсгæ, поселоччы раздæры разамындмæ ис бирæ фарстатæ. Хæдбар кусæндон «Дирекция жилищных строительных программ»-ы сæргълæууæг Бесолты Зойæ: «Поселок лæвæрд никæмæн æрцыд: нæдæр Джызæлæн, нæдæр горæтæн. Афтæмæй адæмæн радтой бадзырдтæ, цæрæнуæтты арæзтады хъуыддаджы кæй архайынц, уый тыххæй. Уыдон дæр скодтой кадастрон паспорттæ æмæ уый руаджы сæ исбонæн хицæуттæ систы. Фæлæ арв æмæ зæххы `хсæн кæй баззадысты, уый тыххæй се `нæмæт цард фæкъахыр. Ныр фарстамæ республикæйы сæргълæууæг Битарты Вячеславы йæ хъус æрдарын бахъуыд. Кусынц ыл». Республикæйы разамынд поселоччы цур радих кодта уæлæмхасæн 49 зæххы хайы. Паддзахадон исбонад æмæ зæххы ахастдзинæдты фæдыл министр Тедеты Руслан куыд æмбарын кæны, афтæмæй поселок регистрацигонд æрцæудзæн афæдзы кæронмæ. Фæлæ ма дзы уымæй уæлдай ис æркæсинаг хъуыддæгтæ. Паддзахадон исбонад æмæ зæххы ахастдзинæдты фæдыл министр Тедеты Руслан: «Сыгъдæггæнæнтæн нæй хъæугæ документаци, уæвгæ йыл ныртæккæ кусгæ дæр нæ кæнынц. Республикæйы сæргълæууæг бахæс кодта бæрнон адæмæн уавæрмæ `ркæсын. Сыгъдæггæнæнтæ куы сцалцæг кæной, уæд уыдзысты Горæтгæрон районы бæрны. Уым поселок сæхи бæрнмæ райсдзысты, официалон æгъдауæй объект æнæхицау у, зæгъгæ, куы сбæрæг уа, уæд». Поселоччы цæрджытæ бафæлладысты сæ гæххæттытимæ республикæйы къуымты рахау-бахауæй. Сæ зæрдæтæ дарынц, ног азы сæ хъысмæт кæй фæрогдæр уыдзæн, ууыл. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv