Бинонты кад

8-æм июлы æгас Уæрæсейы сбæрæг кодтой бинонты, уарзондзинады æмæ иузæрдиондзинады бон. Цæгат Ирыстон дæр фæстейы нæ баззад. Æппæтуæрæсеон адæмон фронты уæнгтæ сарæзтой бинонты парад. Архайдтой дзы бирæсывæллонджынтæ, бинонты хъуыддаг æрæджы чи бакодта æмæ иумæ æмзай-æмзæронд чи баци, уыдон. Цавæр программæ сын бацæттæ кодтой, уый та базондзыстут нæ дарддæры æрмæгæй. Гæлинæ æмæ Вениамин иумæ 50 азæй фылдæр цæрынц. Схъомыл кодтой чызг. Ныр та сæ зæрдæ рухс кæны сæ хъæбулы хъæбулæй. Куыд зæгъынц, афтæмæй кæрæдзийы уарзгæйæ æмæ æмбаргæйæ цæрынæй хуыздæр ницы ис. Гæлинæ Барабанщикова, парады архайæг: «Иумæ 50 азы цæрæм . Базонгæ стæм куысты. Фæцардыстæм хæларæй, сабырæй, кæрæдзийы уарзгæйæ æмæ баргæйæ». Ацы къайы куы афæрсай, бинонты æнгом цард куыд бахъахъхъæнгæ у зæгъгæ, уæд æмдзыхæй фæзæгъынц: хъæуы кæрæдзийæн аргъ æмæ хатыр кæнын, стæй кæрæдзийы рис æмбарын. Вениамин Барабанщиков, парады архайæг: «Цæрут æнгомæй, кæрæдзийæн барын зонут. Сæйрагдæр у, хыл ма кæнын æмæ кæрæдзийы зæрдæтæ ма къахын. Кæрæдзиуыл æууæндын æмæ ма мæсты кæнын. Æрыгæттæн мæ зæрдæ зæгъы уарзондзинад, иузæрдиондзинад æмæ амонд. Кæрæдзийы нымайæнт æмæ хъахъхъæнæнт». Дзæуджыхъæуы арæзт æрцыд бинонты парад. Снысан æй кодтой бинонты, уарзондзинад æмæ иузæрдиондзинады боны кадæн. Мадзал сарæзтой æппæтуæрæсеон адæмон фронты регионалон хайады активисттæ. Æххуыс та сын бакодтой республикон æхсæнадон организаци "Æрыгон бинонты цæдис" æмæ Цæгат Ирыстоны фæллой æмæ социалон рæзты министрад. Æппæтуæрæсеон адæмон фронты куыд гæгъынц, афтæмæй бинонты цардæн аргъ кæныны хæс сæвæрдта нæ бæстæйы президент Владимир Путин. Парад рауад аив æмæ зæрдæмæдзæугæ. Горæты сæйраг уынгмæ æрмæст бирæ азты иумæ чи фæцард, ахæм бинонтæ нæ рацыд, фæлæ ма бирæсывæллонджын æмæ æрыгон бинонтæ, дæр. Стæй тагъд рæстæджы ныйарджы амонд чи банкъардзæн, уыдон дæр. Уый фæстæ та Къостайы номыл фæлладуадзæн парчы парады архайджытæн бацæттæ кодтой цымыдисаг равдысты. Ам æнусы цыппæрæм хайæ фылдæр иумæ чи фæцард, уыцы къайты схорзæхджын кодтой майдантæ æмæ зæрдылдарæн лæвæрдтæй. Сарæзтой дзы бинонты бæлас аразыны дæсныйад æвдисæг ахуыртæ æмæ æркаст. Хуыздæр бинонты бæлас саразын кæй къухы бафтыд, уыдонæн дæр æрцæттæ кодтой лæвæрдтæ. Хистæрты ныхæстæм гæсгæ, кæд бæлас сныв кæнынæн кърандæстæ æмæ гæххæтты гæбаз йедтæмæ ницы хъæуы, уæд бинонты цард бахъахъæнын та афтæ æнцон нæу. Æнæ уарзондзинад æмæ иузæрдиондзинадæй дзы гæнæн нæй. Бæрæгбоны концертæй дæр цух нæ уыд центрон парк. Адæмы се сфæлдыстадæй бахъæлдзæг кодтой республикæйы сывæллæты коллективтæ æмæ Суанты Кимы номыл оркестр. Пхалæгаты Светланæ, Биджелты Бертæ, Суанты Алан, Ирыстоны хабæрттæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv