Дзæуджыхъæуы скъоладзаутæн æмæ студенттæн æфсæддон хайадыл сарæзтой экскурси

26-æм скъолайы æрыгон армионтæ æмæ æфсæнвæндаджы техникумы студенттæн сарæзтой экскурси æфсæддон хайады. Ныр 3-æм аз ахæм экскурситæ иумæйагæй аразынц 58-æм æфсады 34-æм бригад æмæ респубикæйы десантон хайад. Фæсивæдæн радзырдтой æфсæддонты цæттæдзинады тыххæй. Бирæтæн ма сæ къухы бафтыд сæрмагонд дзаумæттæй дæр спайда кæнын. Анна Чаева ацы бонмæ рагæй æнхъæлмæ касти. Чызгæн тынг æхсызгон у, æфсæддон хайады экскурсийы кæй архайдзæн, уый. Чызг ахуыр кæны 9-æм къласы, ныр 4-æм аз ис æвзонг æфсæддонты æмрæнхъ. Йæхæдæг нын куыд радзырдта, афтæмæй æрыгæттæ хъуамæ æнæмæнгæй уарзой сæ Райгуырæн зæхх æмæ зоной сæ бæстæйы хъæбатырты. Анна Чаева, ученица 9 класса МОУ СОШ №26: «Сцымыдис дæн, æфсæддонтæн сæ бон куыд арвитынц, уымæй. Цы фæкусынц, сæ сæйрагдæр хæс цы у. Æз куыд базыдтон, афтæмæй уыдон æрмæст сæ штабы нæ вæййынц, фæлæ ма вæййынц концертты æмæ алыхуызон мадзæлтты. Базыдтон контрактты хуызы балцы чи фæцæуы, уыдон тыххæй дæр». Экскурсийы ма архайынц Дзæуджыхъæуы æфсæнвæндаджы колледжы студенттæ дæр. Ислам Магомедовыл цæуы 18 азы. Ацы мадзалы фæрцы йæ бафæндыд æфсадмæ ацæуын дæр. Йе 'ргом тынгдæр аздæхта хæцæнгæрзтæ кæм сты, уыцы бынатмæ. Ислам Магомедов, студент ВЛТЖТ - филиал РГУПС: «Мах федтам, цавæр хæцæнгарз ис нæ æфсадмæ, уый. Уæдæ ма нæ уæлæ акодтам сæрмагонд æфсæддонты дзаумæттæ дæр. Зæгъæм, мæн фæнды фистæгдеджызонты хайадмæ бацæуын. Æфсæнвæндаджы техникум куы фæуон, уæд ацæудзынæн æфсадмæ». Лæппутæн æмæ чызджытæн радзырдтой æфсæддонты царды тыххæй. Сæрмагонд дæсны æвдисæг ахыртæ дæр сын бæстонæй бамбарын кодтой. Ахуырдзауты акодтой хæрæндонмæ дæр. Уым та сын радзырдтой æфсæддонты хойраджы тыххæй. Экскурсийы кæронбæттæн та сын равдыстой хæстон хæцæнгæрзтæ. Ахæм экскурситæ аразынц 58 -æм æфсады 34-æм бригадæйы управленийы къорд, нæ респубикæйы десантон хайадимæ æмгуыст кæнгæйæ. Æппæт ацы экскурситæ аразынц уый тыххæй, цæмæй ахырдзаутæн бамбарын кæной, æфсад цы у, уый, стæй лæппуты цæй тыххæй хъæуы, уый дæр. Игорь Золоев, регионты 'хсæн æхсæнадон организаци «Союз десантников»-ы Цæгат-Ирыстойнаг регионалон хайады сæрдар: «Мах фæнды цæмæй фæсивæд базоной æфсады уавæрты тыххæй. Службæ алы ран дæр иухуызон у. Æрмæстддæр дзы ис танчы, артиллерион, уæлдæфон-десантон, фистæг денджызон хайæдтæ. Мæнмæ гæсгæ, иу аз службæ кæнын зын нæу». Астæуккаг æмæ уæлдæр ахуыргæнæндæттæн ахæм экскурситæ арæзт цæуынц æртыккаг аз. Кæнынц сæ алы хуыцаубон дæр. Октябры мæйæ апрелы онг. Къутæрты Аидæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv