Республикæйы æнтысджынæй кусы программæ «Точка роста» зæгъгæ

Ахуыргæнæндтты уæлæмхасæн ахуырады гæнæнтæ рæзынц. Скъоладзаутæн цæттæ кæнынц ног программæтæ, цæмæй уыдон алывæрсыгæй уæрæхдæр кæной сæ зонындзинæдтæ. Уый тыххæй ныртæккæ нæ республикæйы æнтысджынæй кусы программæ «Точка роста»-зæгъгæ. Йæ фæлгæты, республикæйы районты æмæ горæтты байгом кодтой 17 ахуырадон центры. Мызуры дæр æрæджы райдыдтой кусын ацы проектыл. Мызуры скъолайы та радон урок йæ тæмæны бацыд æмæ скъоладзаутæ цæттæ сты, цы цымыдисаг æрмæг базыдтой, уый сфæлтæрынмæ. Ахуырдзаутæ æрмæст теоретикон ахуыртæм не 'нхъæлмæ кæсынц, фæлæ ма практиконтæм дæр. Астæуккаг кълæсты ахуыргæнинæгтæ кæдфæндыдæр тагъд кæнынц роботехникæйы уроктæм. Мызуры скъолайы программæ «Точка роста» кусы националон проекты фæлгæты. Проект апарахат æнæхъæн Уæрæсейыл. Æрхæццæ нæ республикæмæ дæр. Æнтыстджынæй кусы нæ горæты æмæ хъæуты кæцыдæр скъолаты. Мызуры ахуыргæнæн бæстыхайы байгом æрæджы, скъолайыл 100 азы куы сæххæст, уæд. Калоты Ольгæ, Мызуры скъолайы директор: «Фарон, нæ скъолайыл 100 азы куы сæххæст, уæд курдиатимæ бацыдыстæм нæ республикæйы сæргълæууæг Битарты Вячеславмæ. Уый нæм йе 'ргом раздæхта. Уæдæй фæстæмæ нæм бирæ ивддзинæдтæ æрцыд. Уæдмæ нæм фæзындис проект «Точка роста» дæр. Нæ районы хицауад дæр нын æхцайы фæрæзтæй баххуыс кодта. Фæзындысты нæм, ног технлогитæн дзуапп чи дæтты, ахæм ифтонггæрзтæ». Ныртæккæ Мызуры ахуырдзаутæн ацы кълас у уæлæмхасæн ахуырадон къабæзтæй иу. Уæдæ дзы фадæттæ дæр бирæ ис. Скъоладзаутæ ацы бынаты вæййынц 2 сахаты бæрц. Фæлæ дзы фылдæр хатт баззайынц 4 сахаты дæр. Уый та ууыл дзурæг у, æмæ дзы алчидæр цæттæ у ног зонындзинæдтæм. Скъоладзаумæ исты цымыдисаг хъуыды куы фæзына, уæд æй сæ бон у виртуалон хуызмæ рахæссын. Уыимæ ма сывæллæттæ цæттæ сты 3D проектыл бакусынмæ дæр. Фæлæ фылдæр уарзынц роботтимæ æмæ коптертимæ архайын. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv