Мыггаджы фидауц

Уæлахизы бæрæгбоны мадзæлттæ кæронмæ ахæццæ сты, фæлæ сæ тæваг нырма дæр бæрæг дары. Афтæ, зæгъæм, Плиты мыггаджы минæвæрттæ бабæрæг кодтой сæ хъазуатон æфсымæр, нæ зындгонд æмзæххон Плиты Иссæйы ингæн. Ардæм æрбацыдысты стырæй-чысылæй, йæ ингæныл ын сæвæрдтой дидинджытæ, кæстæрты базонгæ кодтой йæ хæстон фæндæгтимæ. Плиты Иссæ райгуырд æмæ хъомыл кодта Зæронд Бæтæхъойыхъæуы. Æфсæддон фæндаг ын хъысмæт, æвæццæгæн, йæ ныхыл сныв кодта. Æндæр иу лæджы къухы уыйас æнтыстытæ нæ бафты уыцы фæндагыл. Æгæрон сты, Иссæ цы хæрзты бацыд паддзахадæн, йæ райгуырæн фыдыуæзæгæн, уыдон. Канд йæхицæн нæ, фæлæ ма ном скодта æгас Уæрæсейæн дæр. Уымæн дзы сты сæрыстыр йæ мыггаг дæр. Йæ хæстон сгуыхтыты тыххæй йын дзурынц фæлтæрæй-фæлтæрмæ, кæстæртæн æй хæссынц дæнцæгæн. Хистæртæн та у, сæ цард æмæ сæ мыггаг кæмæй сфидыдта, уыцы номдзыд лæг. Никуы ферох уыдзæн æрмæст сæхицæй нæ, фæлæ æгас Ирыстонæй дæр. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv