Æрдзон газы хæстæ

Цæгат Ирыстоны æрдзон газæн хæсыл бафтыд 1 миллиард æмæ 200 милуан сомы. Æмткæй райсгæйæ та, нæ республикæйы иумæйаг хæс у 3 миллиарды æмæ 800 милуан сомы. Уый тыххæй информацион агентад ТАСС-æн фехъусын кодта куыстуат «Газпром межрегионгаз Владикавказ»-ы пресс-службæ. 2 миллиарды æмæ 700 милуан сомы паддзахадæй дарынц промышленнон куыстуæттæ, миллиард æмæ 100 милуаны та - республикæйы цæрджытæ. Бюджетон организациты фиддонты бæрц фарон хæццæ кодта 47%, ацы аз схызт чысыл цухæй 62%-мæ. Фиппаинæгтæ нæй Алагиры æмæ Горæтгæрон районтæм. Хорз куыст кæнынц Дзæуджыхъæуы дæр. Уымæй хъауджыдæр Æрæфы, Дыгуры æмæ Рахизфарсы районты газы фиддонтæ куыд æмбæлы, афтæ не `мбырд кæнынц. Æппæты фылдæр фæхæсджын сты Дзæуджыхъæуы хъармгæнæн куыстуаты - дарынц 1 миллиард æмæ 896 милуан сомы. Раздæр Битарты Вячеслав бынæттон хиуынаффæйады оргæнты кусджытæн бабар кодта хæстæ бафидынæн реструктуризацийы план саразын. Амынд дзы куыд ис, афтæмæй республикон æмæ муниципалон бюджетон кусæндæттæ энергетикты раз хъуамæ сыгъдæгцæсгом уой. Ацы фарстæн дзуапп дæтдзысты Муниципалон иугондты разамонджытæ. Донæн, газæн æмæ электрон тыхæн цæмæй адæм къаддæр фидой, ууыл дæр хъæуы хицæнæй бакусын, фæнысан кодта Битарты Вячеслав. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv