Национ зонадон чиныгдоны абон байгом сфæлдыстадон равдыст «Диалоги», зæгъгæ

Национ зонадон чиныгдоны абон байгом сфæлдыстадон равдыст «Диалоги», зæгъгæ. Равдыст у Байцаты Людмилæ æмæ Байцаты Валерийы иумæйаг куыст. Байцаты Людмилæ у Уæрæсейы æмæ Цæгат Ирыстоны сгуыхт нывгæнæг. 15 хаттæй фылдæр йын уыд йæхи куыстыты равдыст, куыд Уæрæсейы, афтæ Венгрийы дæр. Байцаты Валерийы куыст та баст у керамикæимæ. 1998-æм азæй абонмæ архайдта алыхуызон проекттæ æмæ равдыстыты. Уазджыты бон фенæн уыд керамикæйæ арæзт алыхуызон цымыдисаг дзауматæ, нывтæ æмæ тæвд эмалы техникæйы арæзт куыстытæ. Иу сæ кæны, арты руаджы конд кæй сты, уый. Равдыст бацæттæ кодтой нывгæнджыты диалогы хуызы. Равæрдтой дзы, 5 азы дæргъы автортæ цы куыстытæ бацæттæ кодтой, уыдон. Сфæлдыстадон равдыст фенæн уыдзæн 9 январы онг. Байцаты Люмилæ, равдысты автор: «Нæ проект схуыдтам «Диалоги». Фæндыди нæ адæмæн равдисын алыхуызон æрмæгæй арæзт дзауматæ уыцы иу равдысты. Куыд нывгæнæг æмæ керамист, афтæ нæ ацы куыстытæ хорз æвдисынц. Фæнды нæ Цæгат Ирыстоны нывгæнджытимæ адæмы хæстæгдæр базонгæ кæнын. Нæ зæрдæ дарæм, равдысты уазджытæй алкæй зæрдæ дæр кæй бахъарм кæндзæн, уый». _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv