2019-æм азы нæ республикæйы сцалцæг кæндзысты 6 скъолайы спортивон залтæ

2014-æм азы Уæрæсейы æххæст кæнын райдыдтой паддзахадон программæ «Ахуырады райрæзт». Йæ руаджы дыууæ азмæ сцалцæг æмæ сифтонг кодтой 30 спортивон залы. Ацы аз та программæ бахастой национ проект «Ахуырад»-мæ. Йæ фæлгæты бындуронæй сцалцæг кæндзысты нæ республикæйы хъæуты 6 спортивон залы. Се 'хсæн - Кæрдзыны скъола дæр. Куыд цæуынц цалцæггæнæн куыстытæ, уый федта не сфæлдыстадон къорд дæр. Кæрдзыны спортивон залы цалцæггæнæн куыстытæ райдыдтой 6 июлы. Уыцы рæстæгмæ залæн раивтой йæ сæр. Æрхафтой къулты зæронд уæлцъар. Залæн йæ дуæрттæ æмæ рудзгуытæ дæр раивдзысты ногтæй. Пъолыл сæвæрдзысты фанер. Уый сæрыл та - сæрмагонд спортивон линолеум. Залæн йæ къултыл фæзындзæн сæрмагонд маттæ, цæмæй дзы сывæллæттæ æдасæй сæ рæстæг æрвитой. Базилдзысты залæн йе `ддаг бакастмæ дæр. Сахордзысты йæ, бирæ чи фæлæудзæн, ахæм ахорæнтæй. Кусæг къорды прораб Доййаты Альберты ныхæстæм гæсгæ, се `ргом фылдæр здахынц хæрзхъæддзинадмæ. Кæрдзыны спортивон зал цалцæггонд нæ уыд 1984-æм азæй. Скъолайы директор Богазты Олег куыд зæгъы, афтæмæй ныр тынг цин кæнынц. Кæдæй-уæдæй сын залмæ базилыны фадат фæзынд. Рагæй æнхъæлмæ касысты уыцы хорзæхмæ. Скъолайы цалцæггæнæн куыстытæ баххæст кæныны фадат фæзынд национ проект «Образование»-йы фæлгæты. Йæ сæйраг хæс у хъæуты скъоладзаутæн спортæй архайынæн нырыккон уавæртæ саразын. «Спортивон залтæ бындуронæй цы программæмæ гæсгæ цалцæг кæнынц, уый Уæрæсейы æххæст кæнын райдыдтой 2014 азы. Фæлæ йæ национ проектмæ бахастой 2019 азы. Куыд фарон, афтæ ацы аз дæр нæ республикæйы 6 спортивон залы бындуронæй сцалцæг кæндзысты программæмæ гæсгæ. Стæй сæ нырыккон спортивон гæрзтæй дæр сифтонг кæндзысты. Уымæй уæлдай ма 2020 азмæ дæр нæ курдиат арвыстам. Ныр уал æнхъæлмæ кæсæм цас фæрæзтæ радих кæндзысты. Уымæ гæсгæ сбæрæг кæндзыстæм, цæйбæрц куыстытæ сæххæст кæныны фадат нын уыдзæн, уый», - РЦИ-Аланийы ахуырад æмæ наукæйы министр Людмила Башарина. Нæ республикæйы проекты фæлгæты бындуронæй кæй сцалцæг кæндзысты, уыцы 6 спортивон залы Кæрдзынæй уæлдай сты Суадаг, Лескен, Брут, Предгорное æмæ Притеречнæйы поселоччы. Афтæмæй-иу рæзгæ фæлтæр æнцондæрæй фæцалх уыдзысты æнæниз цардыуагыл. Цалцæггонд спортивон залтæм цæуыны фадат уыдзæнис куыд скъолайы ахуырдзаутæн, афтæ хъæуы фæсивæдæн дæр. Хуасдзауты Алинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv