Аивæдты лицейы сбæрæг кодтой ахуыргæнæджы бон

Арфæйы аккаг сты Аивæдты республикон лицейы ахуыргæнджытæ дæр. Æмзарды тых. Алæмæты пиано. Сабыр идеалон зæлд, диссаджы дикци. Дæсныдзинады ахæм æмвæзадмæ схизын зын у. Фæлæ, лицейы ахуыргæнинæгтæй хиуыл кусын кæй фæнды, уыдонæн уый сæ педагогты фæрцы къухы бафты. 6-æм къласы ахуырдзау йæ ахуыргæнæгимæ иумæ рæсугъд мелоди цæгъдынц. Музыкалон дæсныйад исгæйæ, ахсджиаг у зындзинӕдтӕм хи бацæттæ кæнын. Фыццаг уал хъуамæ сахуыр уай нотæтæм гæсгæ цæгъдын, уый фæстæ уыцы зонындзинӕдтӕй спайда кӕнын цымыдисаг, æнæаипп музыкæйы. Фæлтæрдджын ахуыргæнæгимæ уый зын нæу. Елена Ламбринаиди сывæллæтты музыкæйыл ахуыр кæны ныр 40 азы. Алы сывæллон дæр йæхирдыгонау курдиатджын у. Æрмæст æм хъуамæ лæмбынæг дæ хъус æрдарай. Ахæм хъуыдыйыл хӕст у Еленæ. Фæлæ уал, фыццаджыдæр, сывæллонæн хъуамæ музыкæ йæ зæрдæмæ бахъара. Аивæдты лицейы ахуыргæнинæгты иннæ хай та хорз зоны, цы у классикон экзерсис. Кафт сæ царды ахсы ахсджиаг бынат. Хореографийы куыд æмбæлы, афтæ сæ ахуыртæ райдайынц сӕрӕркуывдӕй, дарддæр гимнастикон фæлтæрæнтæ. Ӕрмæстдӕр уый фæстæ рахизынц кафтмӕ. Сæ ахуыргæнæг Цæгæраты Джинæ сæм лæмбынæг йæ хъус дары. Фæлтæрдджын педагогӕн йæ куыстмæ ис æнувыд ахаст. Цæгæраты Джинæ йæ дæсныйад бонæй-бонмæ тынгдӕр уарзы. Куыд зæгъы, афтæмæй, фыццаджыдæр, сывæллонæн хъуамæ кафт бауарзын кæнай. Уæд зæрдæргъӕвдӕй цæудзæн ахуыртæм. Сфæлдыстадæн та арæнтæ нæй. Аивæдты республикон лицейы æрвылаз раргом вæййынц цымыдисаг курдиæттæ. Йæ рауагъдонтæ кæддæриддæр вæййынц дæсны профессионалтæ. Аивад та сын æгæронæй бауарзын кæнынц сæ ахуыргæнджытæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv