Контролон-уадзæн пунктты дарддæр аразынц эпидемийы ныхмæ сæрмагонд санитарон мадзæлттæ

Контролон-уадзæн пунктты дарддæр аразынц эпидемийы ныхмæ сæрмагонд санитарон мадзæлттæ. Цæгат Ирыстоны фæлхасгæнджытæм цæстдарды управленийы кусджытæ архайынц, цæмæй коронавирус кæй хонынц, уый нæ республикæйы ма апарахат уа. Арæнхъахъхъæнджытимæ æмгуыст кæнынц, аразынц уæлæмхасæн инструктаж. Бæлцæттæ сæ фæндаг кæуылты кæнынц, уыцы бынæтты дезинфекцийы фæтк бæрæг кæнынц. Респираторон инфекциты ныхмæ профилактикæйы тыххæй нысангонд кæм ис, ахæм фыстæджытæ адæмæн уарынц. Цæгат Ирыстоны æнæниздзинадхъахъхъæныны министрадмæ арвыстой сæрмагонд документ. Куыд дзы фæнысан кодтой, афтæмæй сфидар кæнын хъæуы медицинон кусджыты фæткæвæрд, ома, вирус куы рабæрæг уа, уæд сын цы хуызы архайдæуы, уый. Иумæйагæй нæ республикæйы рынчындæттæ æнæнхъæлæджы уавæрмæ куыд цæттæ сты, уый дæр фæлхасгæнджытæм цæстдарды кусджытæ бæрæг кæнынц. Вирус раиртасынæн ифтонг сты сæрмагонд лабораторитæ. Уыдонæн дæр ис нысангонд фæткæвæрд æмæ кусынц йæ домæнтæм гæсгæ. Оперативон мониторингы бæрæггæнæнтæм гæсгæ, пневмонийæ карз рынчынты нымæц рæстæмбис æмвæзадæй бæрзонддæр нæ кæны. Уый та ууыл дзурæг у æмæ нæ республикæйы цæрджытæн вирусæй тæссаг нæу. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv