«Дзæуджыхъæу-Беслæн» маршрут рæстæгмæ уыдзæн ног дзуапдæттæг куыстуаты бæрны

Райсомы 8 сахатыл Беслæны маршруткæтæ æнхъæлмæ кæсынц сæ бæлццæттæм. Знон дæр ма ам рады лæууыдысты адæм дæсгæйттæй. Бирæтæ байрæджы кодтой сæ куыстмæ, студенттæ — ахуырмæ. Транспорт кæй нæ уыд, уый аххосаг сбæлвырд кодтой. Бæлццæттæласæг куыстуат маршрут ауæй кодта æндæр регионæй компанийæн. Уæвгæ сæ бадзырдмæ гæсгæ хъуамæ куыстаиккой 2025 азы онг. Документтæ шофыртæн нал лæвæрдтой. 150 адæймаджы æгуыстæй баззадысты. Æртыккæгæм апрелы Беслæны фæзынд 25 ног паддзахадон автобусы. Бæлццæттæн уыдон не сфаг сты. Уæлæмхасæн транспорт, 5 автобусы «Хагер»-ы æмæ 10 Газелы, нæ баххуыс сты. Абон хи къухты цы маршруткæтæ ис, уыдон адæмы удæнцойæн линимæ рацыдысты, кæд сæм хъæугæ гæххæтыттытæ нæ уыд, уæддæр. Аппаратон æмбырды республикæйы сæргълæууæг Сергей Меняйло æрдомдта дзуапдæттæг кусджытæй фарста цыбыр рæстæгмæ аиуварс кæнын. Æхсæнадон транспорт хъуамæ цæуа æнæ къуылымпытæй. Республикон маршруттæ æмæ, паддзахады бӕрны чи нӕй, уыдонæн сæ бон у кусын уыцы-иу рæстæг. Абон пресс-конференцийы рæстæг профилон уагдоны сæрдар Солиты Тариель журналисттæн радзырдта, конкурсы бындурыл кæй снысан кæндзысты, рæстæгмæ чи кусдзæн, ахæм компани. Бæлццæтты ласдзæн 180 боны. Уæдмæ та уал  сбæлвырд кæндзысты, æдзух сæ чи ласдзæн, ахæм компани. Куысты æууæлтæ нæ аивтой. Æхсæнадон транспортыл хъуамæ 5 азæй фылдæр ма цæуа. Æнæмæнг миниуджытæ та сты валидатор, глонасс, камерæтæ æмæ тахографтæй ифтонгад.