Ольгинскæйы уыд Касаты Батрадз æмæ Хадыхъаты Фатимæйы поэзийы изæр

Сыгъдæг зæрдæйæ цы рæнхъытæ гуырынц, уыдон сты царды хос, адæймагæн дæттынц уды сыгъдæгдзинад. Æмæ кæд искæмæн æнкъараг зæрдæ æмæ уынаг цæст ис, уæд – поэтæн. Касаты Батрадз æмæ Хадыхъаты Фатимæйæн сæ райгуырæн хъæу Ольгинскæйы бацæттæ кодтой поэтикон изæр. Хъæуы скъолайы 6-æй 9-æм къласы онг ахуыргæнинæгтæ, иу иннæйы ивгæйæ, поэтты æмдзæвгæтæ аив бакастысты. Сæ æрыгон удтæ сæрыстырдзинадæй дзаг сты, уый сæ цæстæнгасыл дæр бæрæг у. Мадзал бацæттæ кодтой Ольгинскæйы хъæууон чиныгдоны кусджытæ. Сæйраг нысан у — кæстæр фæсивæды нæ дуджы фысджытæ æмæ поэттимæ зонгæ кæнын. Бæрæгбон бацæттæ кæнын къухы бафтыд культурæйы хæдзары кусджытæ, районы чиныгдоны директор Кодзырты Светланæ æмæ методист Гуцунаты Эммæйы æххуысæй. Батрадз æмæ Фатимæйы поэзийы изæрмæ æрбацыдысты се 'мсис хæлæрттæ, Ольгинскæйы цæрджытæ, Фысджыты цæдис æмæ литературон журнал "Мах дуг"-ы минæвæрттæ. Рæзгæ фæлтæр чиныг нал кæсы, зæгъгæ, фæзæгъынц. Фæлæ Ольгинскæйы скъоладзаутæн уымæй тас нæу. Библиотекæйы æппынæдзухы уазджытæ сты. Æмæ амондджын дæр куыд нæу, уарзон поэт йæхи фыст æмдзæвгæтæ йæхæдæг кæмæн кæсы, уыцы адæймаг.