Дзанайты Барис бабæрæг кодта Дзæуджыхъæуы 40-æм скъолайы тæвд сихортæ куыд цæттæ кæнынц, уый

Дзæуджыхъæуы 40-æм скъолайы тæвд сихортæ куыд цæттæ кæнынц, уый сбæрæг кодта нæ республикæйы хицауады сæрдар Дзанайты Барис. Премьер æрныхас кодта скъолайы директор æмæ скъоладзаутимæ. Йæхæдæг æй федта, хæринаг куыд æмбæлы, афтæ кæй цæттæ кæнынц, уый. Дзанайты Барис ма бабæрæг кодта скъолайы фехтованийы зал. Ахсджиаг у уый, æмæ ацы спорты хуызы сæхи кæй фæлварынц йе 'нæниздзинад хъыгдæрд кæмæн у, ахæм сывæллæттæ дæр. Æппæт Цæгат Кавказы ахæм зал ис æрмæст ам. Бæрæггонд цы бынæттæ æрцыдысты, уыдоны 'хсæн ма скъолайы хæрæндонмæ хойрæгтæ чи ласы, уыцы комбинат дæр. Дзанайты Барисæн равдыстой горæты скъолатæн хæринаг цы уавæрты цæттæ кæнынц, уый. Уыимæ ма фæлхасадмæ цæстдарды управленийы амынддзинæдтæ куыд æххæст кæнынц, уый дæр. Премьер фæнысан кодта, скъоладзаутæ хъуамæ цæттæ кæной иууыл хæрзаддæр, æмæ, сæйрагдæр та, пайдадæр хæринæгтæ. Скъолаты хъарм хæринаг цæттæ кæныны мадзæлттæм республикæйы сæргълæууæг Сергей Меняйло здахы уæлдай æргом. Æрæджы фæлхасады специалисттæ ахуырадон уагдоны рабæрæг кодтой къорд фæткхæлдтытæ. Фæлæ, куыд скъолайы, афтæ комбинаты дæр фиппаинæгтæ аиуварс кодтой. Афтæмæй, хъарм хæринаджы хæрзхъæддзинадæй премьер-министр æмæ специалисттæ дæр разыйæ баззадысты. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv