Сергей Меняйло бабæрæг кодта футболон командæ «Ирыстон»

Сергей Меняйло бабæрæг кодта футболисттæ-ампутантты тренировкæ. Сывæллæтты æмæ фæсивæды спортивон скъола «Юность»-ы стадионы регионы разамонæг бакаст хъазтмæ, аныхас кодта спортсментæ æмæ тренертимæ. Ампутантты футболон клуб «Ирыстон» йæ куыст сног кодта фарон январы, ис дзы 15 спортсмены. Ныртæккæ сæхи цæттæ кæнынц Уæрæсейы чемпионатмæ футболæй, уӕнгцух чи у, уыдоны 'хсæн. Сæргълæууæг фæбæрæг кодта, сæйрагдæр здæхтытæй иу адаптивон физкультурæ æмæ спорты райрæзт кæй у. Куыд фехъусын кодта, афтæмæй Уæрæсейы Спорты министрадмæ арвыстой курдиат федералон бюджетæй æхцайы фæрæзтæ рахай кæныны фæдыл. Йæ нысан у, хъыгдæрд æнæниздзинадимæ адæмæн бассейнимæ физкультурон-дзæбæхгæнæн комплекс саразын. Уымæй уæлдай, Сергей Меняйло республикæйы дзуапдæттæг министрадæн бабар кодта, цæмæй командæ «Ирыстон»-æн ноггонд стадион «Пищевик»-ы тренировкæты фæтк снысан кæной.