Абон Дзæуджыхъæуы кадджын уавæры байгом кодтой пъæлицæйы ног пункт

Абон Дзæуджыхъæуы кадджын уавæры байгом кодтой пъæлицæйы ног пункт. Бæстыхай цыбыр рæстæгмæ сарæзтой горæты администраци æмæ республикæйы мидхъуыддæгты министр Михаил Скоковы хъæппæрисæй. Ахæм курдиаты тыххæй йын фехъусын кодтой цæрджытимæ фембæлды рæстæг. Кадджын мадзалы архайдтой Дзæуджыхъæуы администрацийы сæргълæууæг Æлбегаты Барис, Цæгат Ирыстоны мидхъуыддæгты министрады ветеранты Советы сæрдар Петр Сазыкин, республикæйы мидхъуыддæгты министрады уæнгтæ æмæ горæты цæрджытæ. Мадзалы тыххæй бæлвырддæр радзурдзæн ме*мкусæг Уазиты Зæлинæ. Мæнæ ахæм хуызы Дзæуджыхъæуы байгом пъæлицæйы ног пункт. Ам цæрджыты курдиаттæ исынмæ æппæт хъæугæ уавæртæ дæр фæзынд. Бæстыхайы ис хъæугæ информациимæ фæйнæг. Æнхъæлмæ чи кæсы, уыцы адæмæн фæлмæн бадæн бынæттæ æмæ райдзаст уаттæ. Йе ‘нæниздзинад кæмæн фæцудыдта, уыцы цæрджытæн дзы сæвæрдтой пандус. Мадзалы архайджытæн пъæлицæйы инæлар-лейтенант Михаил Скоков ракодта арфæ. Уыимæ ма бузныджы ныхæстæ загъта Дзæуджыхъæуы администрацийы сæргълæууæг Æлбегаты Барисæн æмæ 58-æм æфсады разамындæн, ацы ахсджиаг хъуыддаджы сын кæй баххуыс кодтой, уый тыххæй. Михаил Скоков, РЦИ-Аланийы мидхъуыддæгты министр, инæлар-лейтенант: «Пъæлицæйы ног хайад кæй байгом уый дзурæг у ууыл, æмæ пъæлицæ адæмы хъуыддæгтæм куыдфæндыйы цæстæй кæй нæ кæсы. Пъæлицæйы кусджытæ сæ бæрнон хæстæ æххæст кæнынмæ кæддæриддæр сты цæттæ. Адæмы æдасдзинадыл бæстонæй архайынц. Ацы пунктмæ чи æрбацæуа, уый, мæнмæ гæсгæ, цы уавæртæ дзы скодтам, уыдонæй разыйæ баззайдзæн». Кадджын мадзалы рæстæг ма Михаил Скоков фæнысан кодта хуыздæр кусджыты. Саккаг сын кодта кады гæххæтытæ æмæ зæрдылдарæн лæвæрттæ. Администрацийы сæргълæууæг Æлбегаты Барис фæнысан кодта Цæгат Ирыстоны мидхъуыддæгты министр Михаил Скоковы æнтыстдзинæдтæ. Йæ ныхæстæм гæсгæ æппынæдзух цæрджытимæ цæуы æмгуыстады фæндагыл. Уый тыххæй арæх саразы цæрджытимæ фембæлдтытæ. Горæтгæрон районы пъæлицæйы хайады хистæр инспектор Тедеты Лалийы чызг Томæ бацæттæ кодта «Участковый полицейский», зæгъгæ, æмдзæвгæ. Йæ аив дзырды ныхасæй балхæдта мадзалы архайджыты зæрдæтæ. Цæгат Ирыстоны мидхъуыддæгты министрад дæрддæр фæнд кæны пъæлицæйы пункттæ нæ республикæйы районты гом кæнын. Ныртæккæ Цæгат Ирыстоны ис 140 пункты. Ивгъуыд аз сæ нымæц уыд 90. Афтæмæй дзæвгар фæкъаддæр пъæлицæйы кусджыты æххуысмæ ацæуыны рæстæг. Участковый инспектортæ æппынæдзух фыццаг рараст вæййынц цæрджытæн баххуыс кæнынмæ. Пъæлицæйы ног хайады кусджытæ сæ хæстæ бæстонæй кæй æххæст кæндзысты, уый дызæрдыггаг нæу. Уазиты Зæлинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv