Кинологты ерысты Ростовы фæуæлахиз Тулойты Георгий

Республикæйы кинологтæ архайдтой, Ростовы цы ерыстæ цыдис, уым. Æгас Уæрæсейæ уырдæм æрæмбырд сты, куыйты цæстæнгас æрмæст фæкастæй дæр чи `мбары, уыдон. Фæлæ дзы ирон дæсныйæн æмбал нæ уыд. Бавдæлд, æмæ се `ппæты дæр амбылдта. Йе стыр æнтысты йын зынгæ `ххуыс фæцис йæ цыппаркъахыг хæлар. Ныртæккæ фæстæмæ Цхинвалмæ сыздæхтысты. Иннæты `хсæн куыд фæсгуыхтысты, уый радзырдтой паддзахадон телерадиокомпани «Ир»-ы уацхæсджытæн. Сæ ист кадртæй сын спайда кодтам, уымæн æмæ дыууæ хæлары хорзæхы тыххæй сымах дæр хъуамæ базонат. Белорусси, Абхази, Хуссар Ирыстон æмæ Уæрæсейы мидхъуыддæгты министрадты 30 командæйы уæнгтæ Ростовы ерыс кодтой кинологон арæхстдзинадæй. Хæрзахуыр куыйтæн лæвæрдтой бирæ хæслæвæрдтæ. Сæ иу, зæгъæм, рæмудзæн æрмæджытæ, кæнæ та æхсæнгæрзтæ ссарын. Сæрмагонд хыгъды æвзыгъддæр разындысты Хуссар Ирыстоны минæвæрттæ. Хуссар Ирыстоны милицæйы лейтенант Тулойты Георгий æмæ йæ куыдз Ардзайæн дзы æмбал нæ разынд. Саккаг сын кодтой сæрмагонд майдан æмæ диплом. Георгий йæ хъилхъус хæлар Ардзаимæ иумæ кусынц ныр цыппар мæйы. Цуанон куыдзы самал кодтой Ростовы, йæ агурыны дæсныйад фæбæрзонддæр кодта Уæрæсейы мидхъуыддæгты министрады Ростовы фæдагурæн скъолайы. Куыдзы ахуыр кодтой рæмудзæн æрмæджытæ, æхсæнгæрзтæ æмæ нæмгуытæ агурыныл. Уыцы скъоламæ Хуссар Ирыстоны милицæйы сæрмагонд къорды кусджытæ фыццаг хатт нæ ацыдысты. Ахæм æмахуыртæ аразын бантыст Уæрæсейы Федерацийы æмæ Хуссар Ирыстоны мидхъуыддæгты министрадты æмгуыстады бадзырды бындурыл. Республикæйы кад хъахъхъæныныл милицæйы къордтæ кусынц 2010-æм азæй фæстæмæ. Уыцы аз равзæрд барадхъахъхъæнæн сæрмагонд нысаниуæгимæ службæйы кинологон къорд дæр. Хъулаты Юрий _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv