Специалисттæ сбæрæг кодтой хæдзæртты газы гæрзты æдасдзинад

Æнæнхъæлæджы уавæрты министрады минæвæрттæ газы службæйы кусджытимæ иумæ радон хатт рацыдысты профилактикон рейды. Сбæрæг кодтой, цæрджытæ хъаргæнæн гæрзтæй куыд пайда кæнынц, бацамыдтой сын, æнæнхъæлæджы уавæры хи куыд дарын хъæуы, уый. Ацы куысты сæйраг нысан у - адæмы сыгъдхъæстæйæ бахъахъхъæнын. Фыццаг уал пецы уавæр сбæрæг кæнын хъæуы. Хъуамæ газ макæцæй хъуыза æмæ пецы куысты æндæр аиппытæ дæр ма уа. Дарддæр специалисттæ æркæсынц колонкæ, аг æмæ иннæ гæрзтæм. Ахæм техникон ӕркаст æнæмæнг мадзал у, хъæуы йæ афæдз иу хатт аразын. Газы службæйы кусджытимæ иумæ - Æнæнхъæлæджы уавæрты министрады минæвæрттæ. Специалисттæ бабæрæг кодтой цалдæр хæдзары, цæрджытæн радзырдтой, æдасдзинады домæнтæ куыд æххæст кæнын хъæуы æмæ сæм куыдфæндыйы цæстæй кæсæн кæй нæй, уый тыххæй. Специалисттæ газы мигæнæнтæй пайдакæнынады аиппытæ нæ рабæрæг кодтой. Уæвгæ, къуылымпыдзинæдтæ куы вæййы, уæддæр уайтагъд бынаты иуварсгонд æрцæуынц. Газы службæйы кусджытæ æмæ Æнæнхъæлæджы уавæрты министрады иумæйаг рейдтæ республикæйы цæуынц æппынæдзух.