Дзæуджыхъæуы цæуынц Цæгат æмæ Хуссар федералон зылдты ерыстæ хоккейæ

Дзæуджыхъæуы ихын галуаны уыд ахсджиаг турнир. Фембæлдысты Цæгат æмæ Хуссар федералон зылды хокеййы командæтæ. Æдæппæтæй 6 командæйы. Се ’хсæн республикæйы «Алайнаг фыранчытæ» дæр. Чи равдыста хуыздæр арæхстдзинад æмæ кæцы командæйæн скодтой тæрхонгæнджытæ хуыздæр аргъ, уый базыдта не сфæлдыстадон къорд. Сывæллæтты хоккей хистæр къорды архайджытæй æппындæр ницæмæй хицæн кæны. Ихыл бацайдагъ æцæг тох. Фæхæрд уæвын иуы дæр нæ фæнды. Хъазтмæ лæмбынæгæй кæсынц тренертæ. Кæм хъæуы, уым амонынц. Иннæ командæты тренертæ дæр сæ хъус дарынц, ныхмæлæуджыты тактикæйы сусæгдзинæдтæ базоныныл архайынц. Ихын галуаны къах бавæрæн нæ уыд. Хъазтмæ бакæсынмæ æрбамбырд сты сабиты ныййарджытæ дæр. Куыд зæгъынц, афтæмæй ерыстæ бæрзонд æмвæзадыл арæзт сты. Разы сты, кæй сæ сбуц æмæ суазæг кодтой, уымæй. Фарсдарджытæ дæр се 'нкъарæнтæ не 'мбæхсынц. Сæ командæтыл сæ зæрдæ риссы. Ацы хъазт уыд Цæгат æмæ Хуссар федералон зылдты фыццаг къæпхæн. Архайдтой дзы 6 командæйы. Волгоград, Ростов на Дону æмæ Стъараполæй. Се`хсæн нæхи «Алайнаг фыранчытæ». Ерыстæ ахсджиаг сты алы командæйæн дæр. Сæ арæхстдзинад æвдисдзысты 5 хъазты рæстæг. Аргъ та сын кæнынц бæрнон тæрхонгæнджыты къорд Краснодарæй. Дыууæ хуыздæр командæйæн уыдзæнис фадат Сочийы кæронбæттæны ерысты бацархайын. Ерысты аразджытæ куыд зæгъынц, афтæмæй сабиты 'хсæн хуыздæрты сбæрæг кæнын æнцон хъуыддаг нæу. Дзæуджыхъæуы ахæм ерыстæ сарæзтой дыккаг хатт. Йæ аразджытæ бузныг сты нæ республикæйы спорты министрадæй, æмбæлгæ æххуыс сын кæй бакодтой, уымæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv