«Интерактивная Осетия», зæгъæ, проект райста президенты грант

Цæгат Ирыстоны рæсугъддæр бынæттæ фенын ис хæдзары уæвгæйæ, уыимæ ма фæсарнæты дæр. Уый къухы бафтыд «Интерактивная Осетия», зæгъæ, проекты руаджы, фæсивæдон бизнес-клубы хъæппæрисæй. 3Д -йы хуызы алкæй бон дæр фенын у Ирыстоны кæмттæ, дзæппæзтæ, мæсгуытæ æмæ æнæхъæн хъæутæ. Дзодзыккаты мыггаджы мæсыг - культурон нысаниуæг кæмæн ис, ахæм цыртдзæвæн у. 14 æнусæй нырмæ лæууы Дæллагхъæуы. Ныртæккæ мæнæ ахæм заууат уавæры ис. Фæлæ раздæр цы хуызы уыд, уый фенæн ис - 3Д кæй конынц, уый руаджы. «Интреаткивная Осетия», зæгъгæ, инетрактивон сайты йæ сног кодтой виртуалон хуызы. Фенæн дзы ис бирæ объекттæ. Иван Серенко, IT-специалист: «Мах бынатмæ рацæуæм, мæсыгмæ алырдыгæй æркæсæм, уый фæстæ та дзы саразæм 3Д макет. Рауайын дзы кæнæм йæ фæзындæй куыддæриддæр уыди, ахæм. Ома кæд калд уа, кæнæн та ныккæлыныввонг у, уæддæр æй нырыккон технологиты руаджы сног кæнæм. Компьтеры руаджы йæ ногæй саразæм, историон цауты æвдисæндартæ хынцгæйæ. Ахæм куыст кæнæм историкты æххусæй дæр». Ирыстоны кæмттæ, хæххон хъæутæ, дзæппæзтæ æмæ мыггаджы мæсгуытæ - иууылдæр сæ фенæн ис мæнæ ацы 3Д виртуалон сайты. Ссарæн дзы ис, раздæр адæймаджы къах кæм не*рлæууыд, ахæм бынæттæ дæр. Зæгъæм, Захъхъагом. Иван Серенко, IT-специалист: «Ацы ком Фæскавказмæ хæстæг у. Уым та æрдз æндæр у. Захъхъагомы тыххæй бирæтæ зонгæ дæр нæ кæнынц. Цæмæй уырдæм бафтай, уый тыххæй фыццаджыдæр ацæуыны бардæттæг гæххæт райсын хъæуы, стæй ма - тынг дард у, бирæ йæм цæуын хъæуы. Уый тыххæй йын æ кой арæх нæ хъусæм. Ацы проекты мæн бафæндыд адæмы базонгæ кæнын, ахæм ком дæр ис Ирыстоны, уый тыххæй. Адæм æй ам уынынц, туристты уæлдай цымыдис кæны». Историон факультеты студенттæм дæр ацы хъуыды цымыдисаг кæсы. Ахуырдзаутæн аразынц сæрмагон балцтæ. Акæнынц сæ Ирыстоны хæхттæ æмæ кæмттæ фенынмæ. Фæссивæды ныхæстæм гæсгæ, æрдзимæ базонгæ уæвын, ахуыргæнæндоны бадгæйæ бынтон пайда нæу, ахæм проекты архайыны фадат та сын кæй ис, уымæй разы сты. Харитон Ванеев, студент 2 курса исторического факультета СОГУ: «Мæнæн æмæ иннæ ахуырдзаутæн нæ истори хуыздæр базонынæн, ахæм фадат фæзынд. Нæ бон у алы къуымтæм араст кæнын æмæ бынат хи цæстæй фенын. Уыдыстæм Дыгургомы, Туалгомы, Урсдоны. Нæ зæрдæмæ дзы тынг фæцыд». Проектыл 5 адæймагæй кусынц. Иу бынат сисынмæ бон бахъæуы. Уыимæ ма боныхъæд хæхты тæргæйттæ куы кæна, уæд та уымæй фылдæр. Сæрмагонд гарзæй - йæ ном коптер, зæгъгæ, - алфамблай бæрзæнттæй сисынц, цæмæй йæ стæй алырдыгæй фенæн уа. Уый фæстæ та - монтаж. Оператор цы сисы уымæй равзары хуыздæр кадртæ. Уыцы куыстæн та бахъæуы 5 сахатæй фылдæр. Саразы дзы видео æрмæг æмæ йæ сæвæрынц сайты. Йæ бынмæ бæлвырд информаци дæр, ууыл та бацархайынц историктимæ æмæ ахуыргæндтимæ. Аида Бзаева, куратор социальных проектов в общественной организации «Молодежный бизнес -клуб»: «Нæ проекты фæлгæты ма фæнд кæнæм 4 медиаурокы саразын скъоладзаутæн. Цы темæ дзы нысангонд уа, ууыл æрныхас кæнæн уыдзæн алыхуызон фæрæзты руаджы, уый дын видеоæрмæг, къам æмæ бæлвырд информаци дæр. Уыдзæн дзы музыкæ дæр. Ахæм фæрæзты руаджы ахуырдзаутæ ног зонындзинæдтæ хуыздæр базондзысты». Интераткивная Осетия, зæгъгæ, проект равзæрд хъуыстгонд сайтæй «Осетия 3Д»-йæ. Йæ аразæг у Дзодзыккаты Олег. Фарон аз, ноябыры уый тыххæй райста президенты грант 2 милуан сомæн. Ныртæккæ сын цы бантыст, ууыл нæ рынцайдзысты, зæгъынц автортæ, дарддæр дæр ног хъуыдытимæ сæ куыст парахат кæныныл архайдзысты. Уазиты Зæлинæ _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv