Архонкæйы рынчындоны туаггуыры системæ кусы æнæ къуылымпытæй

Архонкæйы рынчындон абон коронавирусæй рынчын пациентты нæ исы. Райсомæй дзæбæхгæнæндоны туаггуыры системæйы куыст чысыл фӕкъуылымпы. Цыбыр рæстæгмæ йæ сраст кодтой. Рынчынтæм хæццæ кодта туаггуыры æмбæлгæ бæрц. Фарстайыл бынаты куыстой вице-премьер Александр Реутов, Æнæниздзинад хъахъхъæнынады министры хæстæ рæстæгмæ æххæстгæнæг Тебиаты Сослан æмæ барадхъахъхъæнджытæ. Архонкæйы рынчындоны исæн хайады цур æрæмбырд сты «COVID»-æй рынчын пациентты бинонтæ. Рæстæг — 11 сахаты æмæ 30 минуты. Тагъд æххуысы хæдтулгæтæ дыууæрдæм кæнынц. Рынчынты æндæр дзæбæхгæнæндæттæм ласынц, цæмæй туаггуыры системæйы куыст фæрогдæр уа. Райсомы 9 сахатыл туаггуыры хæтæлы куысты фæзынд къуылымпыдзинæдтæ. 20 минутмӕ хӕтӕл баивтой. Уыцы рæстæг рынчынтæм туаггуыр хæццæ кодта æмбæлгæ фæткмæ гæсгæ. Туаггуыры системæйы куыст сбæрæг кæнынмæ Архонкæмæ æрцыд вице-премьер Александр Реутов. Рахастой уынаффæ, цæмæй рынчынты æндæр дзæбæхгæнæндæттæм аласой. Райсомæй дзы уыд 93 пациенты. Уыдонæй 25-æн се 'нæниздзинады уавæр тæсагдæр уыд, æмæ сæ Æрыдоны, Горæтгæроны æмæ Республикон клиникон рынчындæттæм раивтой. Хъуыддагмæ республикæйы хицауад æппынæдзух йæ хъус дары. Ныртæккæ медицинон уагдон кусы æнæ къуылымпытæй. Рынчынтæ та ифтонггонд сты туаггуырæй. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv