Битарты Вячеслав арфæ ракодта цæгатирыстойнаг спортсментæн

Республикæйы сæргълæууæг Битарты Вячеслав арфæ ракодта дунейы чемпионаты чи архæйдта уыцы цæгатирыстойнаг богæлттæн. Уæгъдибар хъæбысхæстæй дунеон ерыстæ цыдысты Казахстаны сæйраг горæт - Нур-Султаны. 500 спортсмены, 79 бæстæйæ дзы æвдыстой сæ арæхстдзинад. Уæрæсейы иугонд командæйы хæрзиуджыты голлаг сыгъзæрин майдантæй фæхъæздыг кодтой цæгатирыстойнаг богæлттæ - Баййаты Давид æмæ Сидахъаты Зауырбег. Найфонты Артур та сси бронзæ майданы хицау. «Стыр спорты уæлахизтæ æнцон никуы уыдысты» - фæнысан кодта республикæйы сæргълæууæг спортсментимæ фембæлды рæстæг. Битарты Вячеслав стыр аргъ скодта тренерты куыстæн, арфæ ракодта спортсменты ныййарджытæн. Стыр æнтыстдзинады фæдыл Битарты Вячеслав тренерты æмæ сæ хъомылгæнинæгты схорзæхджын кодта æхцайы сертификаттæй. Дунейы чемпион уæгъдибар хъæбысхæстæй Баййаты Давид та сæргълæууæджы къухтæй райста ног фатерæй дæгъæлтæ. Спортсментыл арфæйы ныхæстæ сæмбæлыдысты республикæйы хицауады сæрдары фыццаг хæдивæг Азымты Иринæйæ æмæ спорты министр Хуыгаты Аланæй. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv