Культурæйы колледжы адæмон кафты ансамбль «Амонд»-æн уыд, афæдзы æнтыстытæ кæм равдыстой, ахæм концерт. Программæйы - ирд æмæ аивадуарзджыттæн уарзон кæфтытæ. Коллектив æрмæст нæ республикæйы цæрджытæн нæу зонгæ. Фæсивæд сæхи зæрдæргъæвдæй цæттæ кодтой, уыди сын гастрольтæ дæр. Цалдæр уысмы фæстæ фæсивæд рацæудзысты сценæмæ. Æмæ та аивадуарзджыты тыхджын къухæмдзæгъд ногæй зæрдыл æрлæууын кæндзæн: ирон кафтæй аивдæр æмæ рæсугъддæр зæххыл кӕй ницы ис. Ныртæккæ фæсивæдæн сæйрагдæр у мидтыхстыл фæтых уæвын. Уæвгæ, ацы лæппутæ æмæ чызджытæ сæ цард æнæ аивадæй нал уынынц. Афæдзы æнтыстытæ æвдыст цы концерты цæуынц, уый цыфæнды сфæлдыстадон къордæн дæр йæ культурон бонамонæны ахсджиаг къæпхæн у. Фæсивæд ацы программæйыл фаронæй нырмæ куыстой æмæ йæм бахастой æрмæст хуыздæр кæфтытæ. Ансамбль «Амонд» æрмæст Ирыстоны нæ, фæлæ ма нæ бæстæйы алы рæтты дæр зындгонд у. Сценæмæ рахизгæйæ, кафты дæсныдзинадæй уæлдай, æнæмæнг, хъæуы равдисын æнкъарæнтæ. Фæсивæдæн сæ фылдæр кафынц сабибонтæй фæстæмæ. Сæ цард дæр фæнд кæнынц сбæттын æрмæстдæр аивадимæ. Алы кафтæн — йæхи мидис. Зæгъæм, «Хонгæ» — хуымæтæг кафт нæу. Дыууæ уарзон адæймагæн-иу кæрæдзи 'ввахсмæ фенын æрмæст ацы кафты руаджы уыд. Уый тыххæй, фезмæлдæй уæлдай, ам ахсджиаг у алы фæкаст, алы æнкъарæн дæр. Культурæйы колледжы ансамблы уæнгтæ концерты иууылдæр нæ архайдтой. Чидӕртӕ дзы гастрольтæй нæмæ ссыдысты. Фæлæ программæ уæддæр хъæздыг рауад - уыди дзы инструменталон номыртæ æмæ зарджытæ. «Царды цы фæндаг равзæрстай, ууыл хъуамæ фидар æмæ æнæ дызæрдыгæй цæуай» - бафтыдта Культурæйы колледжы разамонæг. Æмæ колледжы студенттæ ацы ныхасæн сты ирд дæнцæг.