Дзанайты Барис Æххæстбарджын минæвар Юрий Чайкæйæн форум-равдыст "Россия"-йы равдыста регионы стенд

Форум "Россия"-йы Дзанайты Барис Цæгат Ирыстоны стенд равдыста Æххæстбарджын минæвар Юрий Чайкæйæн. Уазæджы сбуц кодтой ирон кафт "Хонгæ"-йæ. Юрий Чайкæ федта истори æмæ аивады экспонаттæ, æрмдæсныты куыстытæ. Æххæстбарджын минæварæн равдыстой, виртуалон технологиты руаджы куыд ис республикæйы туристон маршруттыл абалц кæнын, стæй ирон чъиритæ кæныны квестты бацархайæн. Дзанайты Барис ма радзырдта Юрий Чайкæйæн регионы сæйраг нысæнтты тыххæй, стæй загъта Цæгат Ирыстон æнтыстджынæй кæй рæзы. Алы аз дæр регионы парахат кæнынц инвестортӕ, фылдæр кæны туристты нымæц. Фарон республикæ бабæрæг кодтой 1,5 милуан адæймаджы æмæ сæ нымæц рæзы. Дзанайты Барис бузныг загъта, ахсджиаг проекттæ æххæст кæныны хъуыддаджы республикæйæн кæй æххуыс кæнынц. Зæгъын хъæуы уый, æмæ равдысты экспозици баивынц æмæ сног кæнынц алы къуыри дæр: спорт, туризм, культурæ, фæсивæд, ахуырад æмæ æндæртæ. Уæ зæрдыл уын æрлæууын кæндзыстæм, форум-равдыст "Россия" байгом ис Мæскуыйы 4-æм ноябры Владимир Путины хъуыдымæ гæсгæ. ВДНХ-йы павильонты алы регион дæр равæрдта йæ стенд, уыимæ федералон хицауады оргæнтæ æмæ корпорацитæ. Уазджыты зонгæ кæнынц бæстæйы æнтыстдзинæдтимæ.