Хуссар Ирыстоны номыртимæ машинæтæ

Хуссар Ирыстоны паддзахадон номыртимæ машинæты хицæуттæ ивартæй нæ тæрсынц. Æмæ дзæгъæлы! Паддзахадон автоинспекцийы бæрæггæнæнтæм гæсгæ, сыхаг паддзахады машинæты хицæуттæ иннæтæй æртæ хатты арæхдæр халынц фæндаггон змæлды фæтк. Инспекторты ныхæстæм гæсгæ, фæндæгтыл æвæрд видеоцæстдарды камерæтæ хуссайраг номыртæ нæ уынынц. Уымæ гæсгæ закъонхалæг шофыртæ - æфхæрд нæ цæуынц.  Фæлæ патрулон службæты пъæлицæйæгтæ ивар кæнынц фæндаггон æгъдау чи халы, уыдоны се ппæты дæр. Уæрæсейаг æви фæсарæйнаг машинæтæ сты, уый нæ хынцгæйæ. Фæсарæйнаг хæдтулгæты хицæуттæм уый тыххæй цы хъуыдытæ ис, уый базыдтой нæ уацхæсджытæ. Фæсарæйнаг бæстæты машинæты номыртæ фæндаджы был цы камерæтæ лæууынц, уыдон нæ уынынц - æмæ сæ нæ бæрæг кæнынц. Фæндаггон змæлды æдасдзинады паддзахадон испекцийы статистикæмæ гæсгæ, æгъдаухалджыты 30% сты Хуссар Ирыстоны номыртимæ машинæтыл чи цæуы, уыцы шофыртæ. Адæм та хъаст кæнынц, мах ницы фæтк халæм, зæгъгæ. Фæлæ куыд рабæрæг, афтæмæй фылдæр хатт Хуссар Ирыстоны номыртимæ хæдтулгæтæ фескъæрынц 2 бæстæйы: Уæрæсейы æмæ сыхаг паддзахады паспорт кæмæ ис, уыдон. Машинæты хицæуттæ йæ сусæг дæр нæ кæнынц, хæдтулгæ хыгъды сæвæрын Алайнаг паддзахады бирæ асламдæр у. Уый хыгъд - фæсарæйнаг машинæтæ Уæрæсейаг таможнæйы сæрты ракæныны аргъ машинæйæн йæхи аргъмæ схæццæ вæййы. Уымæй уæлдай ма Хуссар Ирыстоны сæ хæдтулгæты æвгтæ дæр сау цъарæй сæхгæныны бар ис.  Фæндаггон змæлды æдасдзинады паддзахадон испекцийы кусæг: "Хуссайраг шофыртæ фæархайынц, цæмæй сæ фæндаггон фæтк фехалыны тыххæй ма бафхæрой. Раззаг рудзгуытыл сау цъар кæныны бар сын ис. Фæлæ æндæр закъонхæлдтыты тыххæй иваргонд цæуынц. Зæгъæм, светофоры сырх рухсмæ куы ацæуой, гъе та, кæм не мбæлы, уым сæ машинæ куы ныууадзой, уæд." Хуссар Ирыстоны номыртимæ машинæтæ нæ республикæйы дæсгай минтæ сты. Фæндаггон змæлды æгъдау куы фехалынц, уæд сын сæ машинæ иваргондты лæууæнмæ атæрынц. Специалистты ныхæстæм гæсгæ, тагъд рæстæджы ма фæзындзæн ног закъон - закъонхалæг машинæ арæны сæрты куы хиза, уæд ын йæ хицауы æппæт ивартæ бафидын кæндзысты . Зæрдæ дарæн ис, ног закон фæндаггон æгъдаухæлдтыты бæрц кæй фæкъаддæр кæндзæн, ууыл. Биджелты Бертæ, Джиоты Николас, Александр Левченко, Ирыстоны хабæрттæ _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv