Цæгæраты Гигойы номыл бакастытæ

Абон Дзæуджыхъæуы Мамсыраты Дæбейы номыл сывæллæты республикон чиныгдоны ацыдысты Цæгæраты Гигойы номыл литературон бакастытæ. Сбастой йæ, райсом поэты райгуырдыл 95 азы кæй сæххæст уыдзæн, уыимæ. Мадзалмæ æрбахуыдтой Дзæуджыхъæуы 50-æм скъолайы 3-æм къласы скъоладзауты. Цæгæраты Гигойы уацмыстæ ахуырадон чингуыты арæх не `мбæлынц. Уымæ гæсгæ чиныгдоны кусджытæ сæхимæ райстой уыцы бæрнон хæс, цæмæй сабиты базонгæ кæной поэты царды хабæрттимæ æмæ йæ уацмыстимæ. Уыимæ ма базыдтой, поэты æмдзæвгæты бындурыл бирæ зарджытæн мелодитæ фыст кæй æрцыд, уый. Кæй зæгъын æй хъæуы, скъоладзаутæ тынг цымыдисæй хъуыстой, фæрстытæн дзуапп лæвæрдтой. Зæгъын-ма хъæуы уый, æмæ ацы бакастытæ арæзт æрцыдысты хъазты хуызы. Сывæллæттæ къордгай куыстой чингуытимæ, æвдыстой алыхуызон арæхстдзинæдтæ, чи хуыздæрыл фæуа, ууыл архайдтой. Ацы хатт дæр та хæлардзинад тыхджындæр разындис. Æхсызгон уый у, æмæ ахæм мадзæлтæ ацы чиныгдоны фыццаг хатт нæ сарæзтой. Æрвылаз дæр дзы вæййы ахæм чысыл бæрæгбæттæ. Чиныгдоны кусджытæ зæрдæ æвæрынц, сæ традицитæ дарддæр дæр хæццæ кæндзысты. _ Мы рядом в: vk.com/irystontv instagram.com/irystontv Telegram: t.me/irystontv youtube.com/irystontv twitter.com/irystontv