Кусæг балц - районтыл

Цæгат Ирыстоны хицауады сæрдар Тускъаты Таймураз кусæг балцы ацыд республикæйы районтыл. Бæрæг кæны, социалон нысаниуæг кæмæн ис, уыцы объектты арæзтад. Куыстытæ цæуынц федералон бюджеты фæрæзтæй. Тускъаты Таймураз ныртæккæ ис Æрæфы районы, Цыколайы. Æркæсдзæн технологон станцæйы арæзтад куыд цæуы, уымæ. Уый размæ та уыд Дзæуджыхъæуы. Базонгæ къалбасуадзæн куыстуаты арæзтадимæ. Æркаст сын сæ уавæртæм. Проектмæ гæсгæ дзы балхæндзысты нырыккон кусæнгæрзтæ. Уымæн сын радих кодтой 56 млн сомы. Ныртæккæ заводы бæстыхайы фæвæййынц фæлыстгæнæн куыстытæ. Ацы аз сентябры скусдзæн. Хицауады сæрдар ма федта, доныбыл цы ног физкультурон комплекс аразынц, уый. Уыдзæн дзы футболæй æмæ баскетболæй хъазæн фæзтæ. Стæй дугъгæнджытæн фæндæгтæ. Фæзты алыварс сæвæрдзысты 300 бадæн бынаты. Куыстытæн федералон бюджетæй радих кодтой 19 милуан сомы. Ног объект хъуамæ скуса ацы аз, 14 августы. Тускъаты Таймураз куыд фæнысан кодта, афтæмæй æппæт арæзтадон куыстытæ хъуамæ домæнтæм гæсгæ æмæ афоныл арæзт цæуой. Иннæ объект - Дзæуджыхъæуы 12-æм микрорайоны скъола. Аразынц дзы уæлæмхасæн бæстыхæйттæ. Ныртæккæ дзы скъоладзаутæн фаг бынæттæ нæй. Ног агъуыстытæ куы саразой, уæд ма дзы ахуыр кæныны фадат уыдзæн 500 скъоладзауæн. Уый фæстæ Тускъаты Таймураз абалц кодта Æрыдоны районмæ. Бабæрæг кодта Мичуриныхъæуы скъола. Уым аразынц спортивон зал федералон программæмæ гæсгæ. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv